Racism sawirikna inkhelah Real chak
Portugal rama fehchhuak Real Madrid chuan Thawhlehni zan Champions League play-off first leg match-ah a vun rawng avanga hmuhsit tawk ngun tak Vinicius Junior goal khat tihluh hmangin mualneitu team Benfica lakah 1-0 hnehna an sualchhuak a; he game-ah hian chi inthliarna thawm a rikchhuah avangin FIFA anti-racism protocol an tih dan hmangin minute 10 lai inkhel tluang lai a khaihlak!
Goal awmchhun khungtu Brazil forward hian second half tir lam minute 50-naah Benfica goal-veng Anatoliy Trubin-a ven goal-ah Spanish giants chakna goal a khung a, Estadio do Sport Lisboa e Benfica (da Luz) khelmuala mipui 66,387 pungkhawm zinga a tam zawk home team supporter rual an ngawi duk!
Zawng (monkey) nena khaikhin hlawh fo leh a vun rawng ang avanga diriam hlawh chamchi Vinicius hian a goal thun hi amah diriam thintute beihletna’n a lawm over deuh a, yellow card hmanga thunun niin, a hnuah Benfica player Gianluca Prestianni nen an inhnialbuai zui leh.
Television thlalaka a lan danin Prestianni hian a kawr hak lai hmanga a ka hliah chungin Vinicius Jr chungchang hi a sawichhuak a, a bulhnaia Real Madrid player lo awm ve te chuan Benfica player thusawi kha racism kaihhnawih (racial slur) a nih thu an sawi.
Argentina winger-in a tih danah lungawi loin referee Francois Letexier hnenah Brazilian mihang hi a zualko a, racism boruak avangin Vinicius leh team-mate zawng zawngin khelmual an chhuahsan zui ta hial a ni!
Minute 10 lai inkhel tihtawp a nih hnuah game chhunzawm leh a ni a; Kylian Mbappe chuan minute 10 an chawlh hnua khelmual an luh leh hnuah Prestianni hi hmaichhanah vawi duai lo chi inthliarna kalpui ching (bloody racist) tiin a ankhum nghe nghe!
Hun tawp hnaih lam minute 85-ah Benfica manager Jose Mourinho chu yellow card pahnih hmuh vangin hnawhchhuah a ni a, karleh Santiago Bernabeu-a return leg an khelh hunah sideline atangin a team-te inkhel a kilkawi thei dawn lo.
Racism avanga minute 10 lai an chawlh avangin hun pekbelh pawh a rei ta deuh a, minute 12 lai added time an khelh laiin inkhel entu mipui lamin corner chhuih tura mual kilsir pan Vinicius chu a banah an lo vawm sak!
Real hmahruaina a thun hma khan Vinicius hian goal ban sirah a chhuih chhuak a; Real goalkeeper Thibaut Courtois pawhin 0-0 a nih lain Fredrik Aursnes-a goal tur a dansak ve bawk.
Kylian Mbappe pawhin Alexander-Arnold-a ball siamsak a nang hman lo chiah a, goal a khung loh zanah a team a chakpui ta tho!
Racism sawirikna inkhelah Real chak
