Racquet vaw sawi bawih Medvedev!
Infiamna thenkhat ang bawkin lawn tennis-ah pawh hian player intumte intithinrim leh insualbuai an awm zen zen lo a, an lungawilohna an tihlanna tam ber chu match official-te hnial a ni a, a dang leh chu an thinrim hrikthlakna atana an hmanrua (racquet etc.) hman lai vuak chhiat a ni! Hetih kawnga mikhual lo tak Daniil Medvedev chu chuti ang chetna lantirtu hnaivai ber a ni rih.
Monte Carlo Masters khelh mekah Russian player hian an intum tawh tum danga a la hneh loh ngai loh Matteo Berrettini lakah game khat eih pawh la loin 6-0 6-0-in a tlawm chiang hle a, a thinrim insum zo lo hian a racquet hum lai chu chhuat vuakna’n a hmang bur bur a, a sawi chhe hneh kher mai!
Kum 49 lek awh he second round match-a a ngam loh kha world number 90-na daih Berrettini a ni a, chak zawk tura rinkai zawk a ni chunga khati teh hrepa chianga a tlawm ta mai kha a ngai thiam thei lo a ni.
World number 10 hi a khel chhe ve lah tak bawk a, unforced error tum 28 ngawt neiin, double fault vawi nga lai a nei tling bawk.
Tarlan tawh angin, Medvedev hi chak loh thinrim la na ve thei tak niin, nikum US Open-ah pawh khan photographer pakhat lakah a lo mualpho tawh bawk.
Tun tuma a ngam loh kum 29 mi wildcard Berrettini hi 2021 Wimbledon finalist ve ngat kha niin, Russian hneha third round a luh hnuah a career-a a khelh that berte zinga mi a nih thu leh Medvedev a hnehna match pumpuiah khan shot vawi thum bak tihsual a neih awm a hre lo a, a ruahman ang taka a khelh thu leh a ralthuam kawlte’n hna an thawh that thu a tarlang tel.
World number six lai lo luah chho ve tawh Berrettini hian rising Brazil star Joao Fonseca a hmachhawn zui leh.
Monte Carlo inkhel dangah world number 15 Andrey Rublev pawh tla hma pawlah telin, Belgium player hriat la hlawh thui lo Zizou Bergs chuan 6-4 6-1-in a hnehve bawk.
Racquet vaw sawi bawih Medvedev!
