Congress chief hlui Rahul Gandhi chuan BJP te chuan thuneihna chu chatuana chang turah an inngaih thu sawiin mahse chu chu thil theih a nih loh thu sawiin Opposition te tangrualin Indian democracy siam tha turin an thawkho dawn tiin a sawi.
London-based think tank Chatham House a thusawina a neihah Gandhi chuan Rashtriya Swayamsevak Sangah (RSS te chu Muslim Brotherhood te nen inang tia sawiin ‘fundamentalist, fascist pawl’ tiin a sawi a.
Kar khat chhung United Kingdom tour a neihnaah Congress leader, Kerala a Wayanad Lok Sabha constituency aiawh chuan rorel lai Bharatiya Janata Party (BJP) te chu India rama lungawilohna hmeh mih tumah puhin Israeli spyware Pegasus pawh a phone-ah an dah ru tiin a sawi bawk a.
“BJP tena thuneihna kum 10 an chan hma in, kum 10 rorelna kan chang tawh a. BJP te hian India ramah thuneihna an chan chu chatuana chang tur angin an inngai a, chu chu thil awm dan a ni dawn lo” tiin Gandhi chuan a sawi a, “A nihna takah chuan independence atanga thlir chuan Congress chuan hun tam zawk thuneihna a chang a ni,” tiin a sawi.
Foreign media te chuan ‘Indian democracy-ah harsatna lian tak a awm’ tia an tarlan thin thu sawiin a nihna takah chuan ‘India rama democratic institution inbeihna chu India mawhphurhna a ni’ a ti bawk a.
Q&A session neih zuiah India ram democracy dinhmunah mekah European sorkar ten eng nge tih nei se a duh tia zwhna chu Congress leader chua, “Pakhatnaah, hei hi kan harsatna, keimahni ram chhung bik harsatna a ni a. A chhana pawh a chhunglam atanga chhuak tur a ni. Mahse, Indian democracy chu alen em avangin global public good a tlinga a nghawng te chuan kan ramri piah lam a nghawng tel a ni,” tiin a sawi.
“Indian democracy hi a tluchhia a nih chuan, ka ngaihdan chuan, he kan chenna khawvela democracy chuan a tuar hle dawn a, a na hle ang. Hei vang tak hian kan tan mai ni lo, in tan pawh a pawimawh a. Kan harsatna chu kan hmachhawn mai dawn a, mahse, an harsatna chuan khawvel a nghawr dawn a ni. Eng nge in tih tur chu in kuta awm a ni a. Mahse, in hriatreng tur chu India rama thil thleng in ngaihven reng a ngai a. India rama democratic model te chuan beih a tawh reng vang a ni,” tiin a sawi.
Congress leader chuan India rama institution te chu RSS ten an hnehchhuh tawh thu sawiin foreign audience tena RSS an rhiatfiah theihna tura sawifiah tura tihna chua, “Secret society a ni a. Muslim Brotherhood te nena huangkhata awm leh democratic hmanga thuneihna changa chumi hnua democracy chu chhutchhiat chu an tum ber a ni a. Kan rama institution hrang hrangte an hnehchhuh tawh dan chuan mak min tih tir hle a ni. Press, judiciary, Parliament, Election Commission- institution tin ten nawrna an tawk a, vauin an awm a, kawng khat talin emaw thununin an awm mek,” tiin a sawi bawk.
Rahul-an BJP ten thuneihna chatuana chang turah inngai ti
