Congress president Mallikarjun Kharge chuan UK a Rahul Gandhi thusawiah ngaihdam dil a tulna reng a awm lo tiin a sawi a, ngaihdam dil phuttute chuan Prime Minister Narendra Modi-an ram pawna India mipuite ‘hmingchhe taka’ a chhuah thinah ngaihdam dil tir phawt rawh se a ti.
BJP leh senior Minister thahnem tak te chuan Rahul Gandhi chu UK ah ‘democracy-in beih a tawk’ tia India a sawi chungchangah ngaihdam dil turin an phut a ni.
“Rahul Gandhi laka ngaihdam dil phuttute hian Modi-an ram panga paruk a tlawha kan ram mipui hmingchhe taka a chhuah chungchangah ngaihdam dil phut se, India rama piang nih chu sual a ni a ti a ni lawm ni,” tiin Kharge chuan a sawi.
“India ramah democracy a tlahniam chiang a, freedom of expression leh speech te tihchak lohin a awm a, TV channel te nekchepin an awm a, thudik sawi te lung inah khung an ni a. Hei bak baka democracy tihtawp tumna a awm em ni?” tiin Congress president chuan a sawi a.
“Chuvangin, ngaihdam dil tulna a awm reng reng lo,” a ti zui bawk.
UK-a tunhnaia inkawmna an neihah Rahul Gandhi chuan Indian democracy chuan beih a tawk mek tia sawiin India institution te chu nasa taka tihnep tuma beih mek a ni a ti a. British parliamentarians te hnena thusawina a neihah pawh Rahul Gandhi chuan Lok Sabha-ah pawh opposition member tena thil pawimawh an sawi dawnin microphone te tihtawpsak an ni, a ti bawk.
Gandhi thusawi hian politics-a inbeihna nasa tak thlengin BJP te chuan foreign rama India tihhmingchhiat tumna an tihsak a, Congress te chuan chhang letin PM Modi ber zawk chu ram chhung politics ram pawna aupui an tilet ve thung.
Rahul Gandhi-an ngaihdam a dil tul lo ti
![](https://theaizawlpost.org/wp-content/uploads/2023/03/rahul.jpg)