Rajawat kutah Orleans Masters BWF World Title
France rama open badminton tournament khelh thin Orleans Masters championship men’s singles final-ah Pathianni khan Indian shuttler Priyanshu Rajawat chuan Denmark star Magnus Johannesen lakah minute 68 chhungin 21-15, 19-21, 21-16 hnehna a chang a, a career-a a title lian ber a hmin.
Madhya Pradesh tlangval hi kum 21 mi chauh la niin, 2022 Thomas Cup-ah pawh khan Indian team-ah telin ram tan match khat a lo khel ve tawh a; Pathianni Orleans khaw final-ah world number 49 Johannesen hnehin hlawhtlinna lian a sualchhuak.
Final-a intum shuttler pahnih kha kum inzat niin, qualifiers kaltlanga final thleng ve ve an ni bawk a, Indian zawkin world tour super 300 lallukhum a chang.
US dollar 240,000 semralna tournament final kha player pahnih intawn vawikhatna a ni.
Orleans khaw tournament kha super 100 event a ni thin a, kumin atangin tournament level an tisang a, super 300 a nih hnuah Indian tlangval chu champion hmasaber a ni.
Rajawat kutah Orleans Masters BWF World Title
