Rajiv Gandhi Stadium-ah LPS Cup final

Rajiv Gandhi Stadium-ah LPS Cup final
Thla khat chuang awh tur LPS Cup Inter Village Football Tournament chu tun February ni 20-ah tanin, thla thar March ni 22 khian Mualpuia Rajiv Gandhi Stadium-ah final khelh a ni ang.
Zirtawpni zanah Chanmari YMA Hall, Aizawlah Mizoram Youth Commission Chairman Malsawmzuala Ralte chuan tournament pet hawngin, a tir lam round of 16 thlenga an khelh chhoh dan tur fixure a tlangzarh nghal dawn a, a hnuah quarter-final atanga final thlenga an khelh zui dan tur pawh that leh a ni ang.
A tirah 1st MAP Ground, Armed Veng leh MFA Ground, Sairang Dintharah round hmasa khel tura ruahman ni mah se kalkawng chungchangah harsatna awm thei a nih avangin MFA Ground aiah Ramhlun Sports Complex-ah khelh a ni zawk dawn a ni.
Khelh zawn chhoh ngar ngar a ngaih dawn avangin player-te’n hun awl an nei tam tawk dawn lo a, an himna tur ngaihtuahin round of 16 atanga final thlengin inkhel apiangah first half leh second half-ah chawlh lailawk ‘cooling break’ minute thum hman thin a ni ang.
A thiam 16 inelna atangin Rajiv Gandhi Stadium-ah vek inkhel vawi 17 a awm dawn a; March ni 5-8 chhungin round of 16 khelh a ni ang a, March ni 12 leh 13-ah quarter-final, March ni 15 leh 16-ah semi-final first leg, March ni 18 leh 19-ah semi-final second leg, March ni 22 (Zirtawpni) zanah final khelh a ni ang.
Tualchhung football tihnun thar zel a nih theihna’n Aizawl District Football Association leh LPS Vision chuan hlawhtling taka tournament kalpui an duh a, a hmuna inkhel en turin mipui an sawm bakah media kaltlanga a tam thei ang berin an ena an hriatpui theihna’n hma lak an tum tel a ni.
LPS Vision chuan round of 16 atangin LPS 1-ah inkhel zawng zawng live-in a pechhuak dawn a, hemi hma zawng inkhel a awm ni apiangah report siamin zanah LPS 1-ah a tichhuak thin ang.
Tun tumah hian team 62, Aizawl chhung 41 leh Aizawl pawn 21 an tel a; tournament huaihawt tawh vawi sariha champion thei team pali – Ramhlun South (vawi thum), Armed Veng (vawi hnih), 2016 champion Bethlehem Vengthlang leh 2017 champion Chhinga Veng an tel kim a; district dang atanga sawm bik pali – Sialhawk, Keifang Joint, Thenzawl Joint leh Kawnpui Joint an tel dawn bawk a ni.
Tarlan tawh angin, Round of 16 atanga final thlengin LPS Cup Inter Village Football Tournament-ah inkhel vawi 17 a awm dawn a, LPS Vision chuan live-in a pechhuak vek ang.
Thawhlehni khan LPS Vision Director Lalsawmliana Pachuau office, Zarkawtah LPS leh Aizawl District Football Association-in ruahmanna an siam fel a, round of 16 atangin zanah vawi 11 leh tlaiah tum ruk inkhel a awm dawn a ni.
Last 16-ah inkhel pariat awmin, tlai dar 4 leh zan dar 8-ah pali ve ve, quarter-final-ah inkhel pali awmin, tlai dar 4 leh zan dar 8-ah tum hnih ve ve khelh a ni ang.
Double leg-in semi-final khelh a ni dawn a, zan dar 8-ah vek inkhel vawi li awmin, zanah final a ni dawn bawk.
A thiam 16 inelna atangin player of the match thlan a ni dawn a, inkhel tum 17 awmin, mipui tam zawkin an en theihna’n tlaiah vawi ruk awmin, a bak zawng zanah vek khelh a ni ang.