Police-ten Uttarakhand-a Udham Singh Nagar-ah state hran hrana ralthuam tawlh thin nia hriat mi pahnih an man a, Pakistan-a firfiak pawl, Al-Badr nen pawh an inzawm nia sawi a ni a, ralthuam leh ralthuam tam tak an hmuchhuak bawk.
Chhuitute chuan police-in an mi man pakhat zawk hnenah hian Al-Badr nena inzawm over-ground worker (OGW) pakhatin kum 2021 khan a bank account-ah Rs. nuai 7 vel a thawn tih an hmuchhuah hnuah firfiakte inzawm dan an chhui zui mek tih an sawi.
Police-te chuan puhte hi Honey tia koh, Harendra Singh leh Ranu tia koh, Nikhil Verma, kum 27 ve ve, Udham Singh Nagar-a Sitarganj-a chengte an ni tih an sawi a. Thubuai siamsakte hi an hnuhma pawh a mawi vak lo va, thubuai panga vel lo nei tawh ve ve an ni.
An dapnaah silai pahnih, revolver pakhat, tualchher pistol pahnih leh kartut 344 an man a, 215 chu la tha a ni a, an car an man tel bawk.
Senior Superintendent of Police (SSP) Ajay Ganpati-a chuan Nilaini khan Operation Prahar hnuaiah Rudrapur leh Sitarganj Police Station-a Special Operations Group (SOG)-ten joint checking drive an kalpuiah man chhuah an ni tih a sawi.
“Checking drive kan neih lai hian SIDCUL Phase II huam chhunga kawng sial chawp kaltlanga number plate nei lo Swift car var hmanga dan loa ralthuam phurtu nia rinhlelh mi pahnih chungchang kan dawng a, kan team chuan an dang nghal vek a, tlai dar 06:25 khan lirthei hi man an tum a; mahse, a khalhtu hian man a nih loh nan lirthei hi khalh letin an tlanchhia a, a tawpah chuan kawngpui siam lohah a tang ta a. Kan rinhlelh pahnihte hi man an ni ta a ni,” a ti.
“Thu kan zawha min chhan tawh chinah chuan Operation Prahar hnuaiah police-ten mi sual pawlte lan beih avangin Chorgalia ramngaw bialah ralthuam thuhruk tumin an kal tih an sawi a, state dang dangah dan lovin ralthuam an pek kual thu leh mi mal hnenah an pek thin thu pawh an pawm a. Jammu & Kashmir-ah pawh mi pahnih dang, Inderjeet Sandhu-a leh Pulbhatta-a cheng, Pawan Sandhu-a chu an thil tihnaah hian an tel ve a, ram pawnah an awm mai thei thung,” tiin SSP chuan a sawi bawk.
SSP chuan an mobile number leh bank account an chian hnuah Jammu & Kashmir-a account-a thil tih rinhlelh awm eng emaw zat hmuh a nih thu a sawi.
“Al-Badr nena inzawm OGW pakhat, Shopian-a cheng, Rehan Mir-a chuan Rs. nuai 7 vel chu man pakhat zawk bank account-ah a thawn a, ani hian kum 2021 khan pistol a thawn tih a sawi a; mahse, keini chuan sum tam tak an inthawn avangin ralthuam tam zawk a thawn kan ring,” a ti a. Jammu & Kashmir atang vek hian mi dangte pawhin rinhlelhawm tak tak pawisa an thawn fo tih pawh an hai chhuak tih a sawi a, eng atan nge tih erawh an la hriat chian loh thu a sawi.
“Jammu & Kashmir-ah team kan tir dawn a, hriat tur tul dang kan la khawm dawn a ni,” a ti.
“Mir-a hian kum 2021-a Delhi Police Special Cell-in firfiak kaihhnawih thubuai ziah luh a hmachhawn mek a, he thubuaiah hian Honey pawh zawn mek a ni a, Honey man thu hi Delhi Police Special Cell pawh kan hriattir tawh,” a ti.
Ralthuam tawlh eh Pak firfiak nena inzawma puh pahnih man
