Ram leh state thenawm atanga Mizorama sahimna zawnga rawn lut Zohnahthlakte lo dawnsawn leh enkawl zui dan fel tak siam ngai an tih thu PC party chuan an sawi.
PC president Vanlalruata chuan Manipur atanga Mizorama lut raltlante dawnsawn dan leh thil awmdan zirin, khaw thenkhatah mi hrang hrang an kawm kual tih a sawi a. Thenawm ram pahnih – Bangladesh leh Burma bakah Manipur state atanga kan unau raltlan lokalte dawnsawn dan chu tuna kan kalpui dan aia him leh thlamuanthlak zawka kalpui a ngai, tiin, “Kan enkawl leh awmtir dan hi kan ram economy tana tha tur, kan hnam tana tha tur leh tun aia anmahni tana tha tura kalpui a ngai a ni,” a ti.
A hmuna an en atangin, ramria kan lo dawnsawn dan tihhmasawn ngai an tih thu te, police duty tihchak ngai an tih thu te, raltlan lo lut chhinchhiah dan tihchangtlun ngai an tih thu te sawiin, “Kan tlawh chin khaw hrang hranga raltlan awmdan kan en atangin, khawtlang tana hlawkpui zawngte, anmahni tana tha tur zawngte, hun kal zela kan hnam tana tha tur zawngtea inenkawl a ngai kan ti hle,” a ti.
Thenawm ram leh state-a thil thleng avangin raltlan an la pung zel dawn nia a lan thu PC president hian a sawi a. Heng mite kan dawnsawn leh enkawl dan hian kan ram leh hnam hmalam hun a hril thui dawn avangin mitinin ngaihtuahna hman a ngai tih a sawi. Zau taka inrawnkhawmna atanga siam policy felfai sawrkarin a neih thuai a, awmze neia kal thuai a tul an tih thu a sawi a ni.
Raltlan dawnsawn leh enkawl dan siam a ngai – PC president
