Myanmar atangin Zo hnahthlak engemaw zat Mizoramah an raltlan a, tun hnaiah mahni khaw lama an kir nual avangin Mizorama raltlan awm mek zat pawh a hma aiin a tlem.
Mizoram Police te’n an chhinchhiah danin, December ni 17 khan Mizoramah Myanmar atanga raltlan hi mi 26,122 an awm mek. October ni 1-ah khan raltlan awm zat hi 27,905 tiin an chhinchhiah a, thla khat leh a chanve vel chhungin 1783-in a tlahniam tihna a ni.
Raltlante hi an insawn deuh reng a, mahni khaw lama kir leh an awm thin bawk. Tun hnaiah kir leh hi an awm nual tih thu dawn a ni.
Police-te chhinchhiah dan chuan, raltlante zinga mi 12,062 chu relief camp-ah an awm a, mi dang 14,079 chu hmun dangah an awm. Relief camp hi 76 a awm a, hmun danga awmte hi in luaha chhungkuaa khawsa leh chhungte bula awm an ni hlawm.
Raltlante hi mipa 7986 leh hmeichhia 8188 an ni a, naupang 9948 an awm.
Champhai district-ah an tam ber a, 13,662 an awm. An tlem berna Kolasib district-ah chuan 172 an awm a, Mamit district-ah 261 awm.
2021 February ni 1-ah Myanmar-ah sipaiin sorkar lai paih thlain sorkarna an pawng lak a, sorkar sipaite leh mipui lam an inbeih zui avangin mi engemaw zat chu hmun hrang hrangah an tlanchhia a ni. A tir phat atangin Mizoramah raltlan an awm nghal a, tun hnai teah chuan lut thar hi a hma angin an awm tawh lo. An awm pawhin an awm zeuh zeuh chauh.
Myanmar-a rorel mektu sipai sorkarin December ni 28-a inthlan buatsaih an tum a, hei hi mipuiin an pawm loh avangin sipai sorkar hian mipuite hi na takin an nawr mek. Hei vang hian tunlaiin hmun hrang hrangah an buai a, tun hnaiah pawh Vaphaiah raltlan lut thar an awm. Hmun dangah a hlawma lut thar erawh an awm rih lo.
Myanmar a\anga raltlan zat
District Raltlan
Aizawl 4303
Champhai 13662
Hnahthial 540
Khawzawl 359
Kolasib 172
Lawngtlai 1141
Lunglei 1590
Mamit 261
Saitual 188
Serchhip 711
Siaha 3195
Total 26122
Raltlan engemaw zat an kir
