Zokhawtharah raltlan inziaklut thar mi sang chuang an awm a, he khuaah hian raltlan an pung tihna a nih rualin, mi sang chuang an lut thar tihna erawh a ni chiah lo.
Chawlhkar hmasa lamah khan Zokhawthar VC te’n India sorkar atanga raltlante tanpuina tur buhfai an sem a, mihring sang chuang an inziaklut thar a ni. Buhfai hi mi pakhat tan Kg 30.500 zelin an sem.
“Kan hnena in-report lo mi sang chuang an lo awm a, tanpuina dawng turin chhinchhiah an ngai si a, mi sang chuang chutiang chu an awm,” Zokhawthar VC president Lalmuanpuia chuan a ti.
Zokhawtharah raltlan sang chuang an lut thar tihna a ni chuang lo a, Zokhawthara lo awm sa, chhinchhiah thar an ni tih a sawi a, mahse tun hnai thla hnih khat chhunga lut thar chu an ni tih a sawi.
“Mahni mum muma lo mum ve kha an ni a. Tun hnaiah khi lamah an inkap nasa a, Falam vel hi ni berin kan hria a. District hmunpuiah pawh an awm ngam lo a, chung vela mite chu mahni remchan dan danin tun hnaiah an rawn tlanchhia a ni. An rawn in-report chuang lo a, keini pawhin kan lo hre lo a,” VC president chuan a ti.
An khuaah raltlan 6000 chuang an awm mek thu a sawi a, a hma angin an in-report thlap thlap tawh lo a, an thiam dan ang angin ei hmuhna tur an dap a, hmun hrana an awmkhawm loh avangin a khaw mite nen an inawm pawlh mai tih te a sawi.
Raltlan an awm bakah an khaw chhehvel Myanmar lam atanga sikul kal naupang engemaw zat an awm thu a sawi bawk.
Myanmar nena inkalpawhna lei khar a nih avangin an khuaah thawh tur a vang a, an ei hmuhna ber bungraw thiar a tawp tak avangin an khaw mite leh raltlante’n a rem rem an thawk a, raltlanah pawh khaw danga inhlawh te an awm tih a sawi.
Champhai district-a Zokhawthar khua hi |iau kama mi a ni a, mihrinh 4000-5000 vel khuaah an inchhal. |iau kam lehlam chu Myanmar a ni a, lei khar hma chuan sumdawnna hmun lian a ni. Myanmar nena inkalpawhna lei hi July ni 25 atangin an khar tawh a, hawn hun tur hriat a ni lo.
Raltlan inziaklut thar sang chuang
