Mizorama tlanchhiaa lut, BSF te’n an kirtir lehte chu hrehawm taka an tei kual hnuah khua an lut tawh a, Bangladesh lamah an awm tawh tih thu dawn a ni.
June ni 15 khan Bangladesh-a Chittagong Hill Tracts-a Zo hnahthlak, mi 200 chuangte chu an sahimna zawngin Mizoramah an tlan lut a, mahse Lawngtlai district-a Kamtali khua atangin BSF te’n an kirtir leh. An chin hriat a ni lo zui a, tunah chuan Chittagong Hill Tracts an thleng fel tawh.
BSF te’n ramri-ah an dah a, mahse mahni khua an lut ngam lo. An khuaa kir leh hi an tan a him lo a, Bangladesh sipaite’n an lo man ang tih te. tihduhdah an tuar ang tih te an hlau. Chuvang chuan kir lo turah ngaih an ni a, khawchhiat vanglai khan mahni khuaa lut ngam lovin, eitur nei mumal lovin an biru kual a ni.
Mizoram lam leh Bangladesh lam ramhnuaiah an biru ren rawn a, Mizoram lam atangin ramri dep khuaa mite’n an chanchin han ngaihven thin mah se BSF an duty ngawrh avangin an pawh thei lo.
Biru kual an nih bakah tlanchhiat ngai thut thut te an nih avangin an darh a, kar hmasa lamah khan a then chu Bangladesh-a Fiangpi-ah an lut. Chumi hnuah mi dang chin hriat a ni lo a, tun hnaiah engemaw zat chuan khua an thleng ve leh tih tih hriat a ni ta a ni.
Thu dawn danin, a then chu mahni khuaah an let a, mahse mahni khuaa let ngam lova khaw thenawm vela biru an la awm. Fiangpi-ah pawh hian engemaw zat chu an awmkhawm.
Tun tuma BSF te’n an kirtir lehte hi mi 200 chuang an ni a, khuaa awm tawh an awm lai hian khuaa la awm lo pawh an la awm tih thu dawn a ni.
Bangladesh-a khuaa lut tawh hi a tam zawk an ni a, mi dang hi ramhnuaiah an la biru em tih hriat a ni lo. Mizoram khuaa lut ta pawh an awm ngei a rinawm tih thu dawn a ni.
Raltlan kir lehte’n khua an thleng tawh
