July thla tirah Myanmar atangin Mizoramah mi engemaw zat an raltlan a, a tam zawk chu mahni khuaah an kir leh tawh. Mahse an la kir kim lo a, mi sang chuan an la cham nia hriat a ni.
Mizoram Police te chuan Zokhawthar-a lutte zingah mi sang bawr an la kir lovah an ngai a, Saikhumphai-a lutah mi 300 dawn an la kir lovah an ngai.
An chhinchhiah danin, Zokhawthar-ah hian 3956 an raltlan a, an zinga mi 2956 chu mahni khuaah an let tawh. July ni 12-ah mi 12 an kir a, chumi hnuah chuan kir an awm tawh rih lo. An chhinchhiahnaa a lan dan chuan, la kir lo hi mi 1000 chiah chiah an ni.
Saikhumphai-a raltlan lut hi mi 744 tiin an chhinchhiah a, an zingah hian mi 435 chu mahni khuaah an let tawh. Mi 289 vel an la cham tihna a ni.
Police te’n raltlan lut thar zat an chhinchhiah hian naupang an chhinchhiah tel lo a, puitlingah pawh chhinchhiah loh an awm nual turah ngaih a ni.
July thla tira raltlante hi Champhai district dep Myanmar lam khaw hrang hranga Zo hnahthlakte an ni a, a tam ber chu Zokhawthar hnaih khua, Khawmawi leh Rih vela mi niin, raltlan tam ber pawh hi Zokhawtharah an lut a ni. Khawmawi vela an inkah hnuah Myanmar-a Leilet khuaah an inkah leh avangin Leilet vela mite hi Saikhumphai lamah an tlanchhe ve leh a ni.
Raltlan lut thar la kir kim lo
