Myanmar atanga tun hnaia a huhova raltlan Mizorama lutte chu an khaw lamah an kir leh deuh vek tawh a, kir lo hi chhungkaw tlem azawng chauh an ni tih thu dawn a ni.
May ni 17 atang khan ni hnih ni thum chhung vel chu Myanmar atangin Champhai district khaw thenkhatah raltlan a hlawma lut an awm a, hun engemaw chen a hlawma Mizorama lut an awm tawh loh avangin a thawm pawh a ring.
Zo hnahthlak pawl pahnih, CNA leh ZRA te inkar tha lovina a nghawng a nih bawk avangin hetianga raltlan a hlawma an rawn lut hian a hun lai chuan ngaihven pawh a hlawh.
Champhai district bawrhsap James Lalrinchhana chuan raltlan lut tharte hi mahni khaw lamah an let leh deuh vek tawh tih a sawi a, “An let leh deuh vek tawh a, chhungkaw tlem azawng let ve lo an la awm,” tiin a sawi.
“An khaw lam a’n ralmuang deuh a, an let leh mai a. A ralmuan huna let leh mai tura rin kha an ni hrim hrim a,” a ti bawk.
Raltlan lut thar hi mi 800 vel an nih thu leh, mi 700 vel chu an let leh tawh nia ngaih a nih thu a sawi.
Raltlan lut thar chhungkaw 200 vel awmna Hnahlan-a mite pawh an kir leh deuh vek tawh a, an VC hruaitute chuan chhungkaw pali panga vel an la awm a, mi dang chu an kir leh vek tawh tih an sawi.
Raltlan lut tharte kir leh tawh
