Tun hnaiah Mizoramah Myanmar atangin raltlan a hlawma lut an awm a, mahse a tam zawk chu mahni khaw lamah an let leh tawh.
July thla tirah Champhai district dep Myanmar lamah an inkap a, hei vang hian mi engemaw zat chu Mizoramah an tlanchhia a ni.
Mizoram Police-in an chhinchhiah danin, Zokhawthar-ah mi 3956 an lut a, an zinga mi 2950 chu mahni khuaah an kir leh tawh. Saikhumphai-ah mi 744 an lut a, mi 474 an let leh tawh.
Police-te hian raltlan lut thar an chhinchhiah hian naupang an chhinchhiah tel lo a, puitlingah pawh hian chhinchhiah loh an awm nual tih thu dawn a ni. Zokhawthar-ah phei chuan an khawtlang hruaitute’n puitling chhinchhiah loh leh naupang nen hian mi sing dawn chu an luta an rin thu an sawi.
La kir lote hi chhungte belin an awm a, an boruak la ngaichang rih an ni tih thu dawn a ni. Inkah leh inbeih chu a awm zui rih lo a, mahse la ngaihngam zan lo an awm a, a kir lehah pawh hian thlamuang zan lo an awm tho tih thu dawn a ni.
Saikhumphai-a lut leh Zokhawthar-a lutah hian hmun danga awm rih, Aizawl thleng tate pawh an awm tih thu dawn a ni.
Saikhumphai-a lut hi khaw pali vel atanga kal an ni a, Zokhawthar-a lutte hi Khawmawi leh Rih leh an bul hnai vela mite an ni.
Zokhawtharah chuan July ni 14 atanga khan |iau kana insumdawn tawnna pawh an chhunzawm a, tunah chuan thil a pangngai tawh. A lehlam lehlamin insumdawn tawnnaa an hna hi pangngai takin an thawk tawh.
Nikum lam atangin lei hi an khar a, gate chhungah luhka te tak te hawn niin, chutah chuan phalna neite an lut tlang thei, bungrua pawh chutah chuan an inpe tawn thin.
Raltlan tam zawk kir tawh
