Manipur atangin mi sing chuang Mizoramah an raltlan a, heng raltlante tuamhlawmna tur hi Mizoram sorkarin sorkar laipui a\anga dawn thuai a beisei tih thu dawn a ni. Home secretary H Lalengmawia chuan ministry of home affairs atanga thu dawn an neih thu a sawi a, Manipur atanga Mizorama tlanchhiate puihna tur hi an dawng dawn nia a lan thu The Aizawl Post a hrilh.
Mizoram sorkarin Manipur atanga Mizorama tlanchhiate puihna tur hi May thlaah daih tawh khan a lo dil tawh a, ministry of home affairs-ah hian cheng vaibelchhe 10 a dil a ni.
Home secretary chuan kar hmasa lamah khan ministry of home affairs atang hian tawngkaa thu an dawn thu a sawi a, Manipur atanga Mizorama tlanchhiate tuamhlawmna tur hi pek tum a nih thu, mahse a sumfaia inpe lova an mamawh thilte pek tum a nih zawk thu an hrilh tih a sawi.
“Verbal communication-a kan thu dawn a ni a, ziaka thudawn ni lo mah se kan bawhzui nghal a,” a ti.
Chawlhkar liam ta tawp lamah khan ministry of home affairs hnenah hian raltlante tuamhlawmna tur thil hrang hrang an thlen nghal thu a sawi a, buhfai te, thosilen te, bungbel te, in chhung mamawh thil hrang hrang, an mamawh thil hrang hrang an thehlut tih a sawi.
Manipur atanga Mizorama tlanchhiate hi an tam lam sawi fak a har a, an tam lai chuan mi 12000 chuang te pawh an tling. September ni 20 kha chuan an vaiin mi 11,973 tiin Mizoram sorkarin a chhinchhiah.
Raltlan tuamhlawmna tur dawn hmel
