Tualchhung buaina atanga Myanmar, Bangladesh leh Manipur atanga sahimna zawnga Mizorama tlanlut zingah zirlai 8119 hnenah zirna chhunzawm tir an ni tih School Education minister Lalchhandama Ralte chuan a sawi.
School Education department chhinchhiah danin, tunah hian Myanmar atanga raltlan zirlai 6366 an awm a; Bangladesh atanga raltlan zirlai 250 leh Manipur atanga raltlan zirlai 1503, an vaiin zirlai 8119 an awm. Heng zirlaite hi school uniform leh zirlaibu a thlawna pek vek an ni a, Board exam an hmachhawn theihna’n zirlaite documents neih ang ang hmangin an register bawk.
Mizoram sawrkar chu nationalist rilru pu a nih avangin hmun hrang hrang atanga Mizorama Zohnahthlak raltlante chu ang khata enin, Zofate insuihkhawm chu an tum ber a ni tih School Education minister hian a sawi a. Department-in theihtawp chhuahin raltlan zirlaite a chhawmdawl tih a sawi.
School Education department chuan hnam tawng dik taka hman leh humhalh ngaipawimawhin, Mizo Language Developement Board an din tih Lalchhamdama Ralte hian a sawi a. National Education Policy 2020 rawtna bawhzuiin pawl 9 leh pawl 10 zirlaiten science leh mathematics Mizo tawnga an zir theihna’n Bilingual textbook an siam a; pawl 11 leh 12 science zirlaibu chu Mizo tawnga siam leh an tum tih a sawi bawk.
Sawrkar sikula zirlai awmzat atanga tehin, a kum leh ami tur zirlaibu an print tir thin avang leh, zirlaibu print tura an biakfel tawh ten an thulhsan avangin zirlaibu sem kim lawk theih a ni lo tih a sawi.
Samagra Shiksha Mizoram hnuaia thawktu 5500 vel an awm thu sawiin, Syatem of National Account a chian loh avanga thawktu hlawh an pek chhuah central lamin an hmuh loh avanga an hlawh tur 2nd instalment an la dawn loh thu a sawi a ni.
School Education minister sawi dang thenkhat:
# Sawrkar hnuaiah zirlai naupang zual deuhte an kal theihna’n Early Childhood Care Education (ECCE) an din a; 433 hawn a ni tawh.
# Sikul naupangten uniform-a buaina an tawh loh na’n inang tlanga siam a ni.
# Zirlaiten infiamna lama ei an hmuh theih nan grassroot sports development programme chu centre 40-ah kalpui mek a ni.
# Samagra Shiksha hnuaiah zirna hmanrua – computer, tablet leh interactive smart board bakah hmanraw chi hrang hrang pek a ni.
# Higher secondary school-ah stream hrang hrang 44 hawn belh a ni a. Secondary school 9, middle school 2 leh primary school 2 hawn belh a ni. DIET building 4 sak zawh tawh leh 5 dang sak mek a ni.