Raltlanah Bible zirlai an awm

Bangladesh atanga Mizorama raltlante zingah Bible zirlai an awm a, an zirna hi tha takin an chhunzawm thei nia hriat a ni.
Bangladesh-a Chittagong Hill Tracts-a Zo hnahthlak, Mizorama raltlante awmna khaw pakhat Chamdur P-a raltlante zingah Bible zirlai hi an awm nual.
Chamdur P atanga thu dawn danin, kumina an khuaa raltlan lutah Bible zirlai hi pasarih an awm a, mipa panga leh hmeichhia pahnih an ni. Nikum lama lutah pawh pahnih, mipa ve ve an awm.
India chhim lama zir an ni a, chawlh laia an haw, raltlan ni zui tate an ni tih thu dawn a ni a, hriat theih chinah Mizorama an tlanchhiat hnuah an zirna hmunah an chhunzawm leh thei tih thu dawn a ni bawk.
Hriat theih chinah Bible zir hi mi 20 an chuang ang tih a ni a, a then chu an zirna hmun atanga an haw pawh mahni khuaa haw thei lo, an chhungte Mizorama an tlanchhiat avanga Mizoram pan ve nghal, chuta tanga an zirna hmuna let lehte an ni. Mizorama an luh hnua Bible zir tura chhuak, zir thar pawh an awm tih thu dawn a ni.
Bangladesh atanga Mizorama raltlan naupangte’n an raltlanna hmunah sikul an kal a, primary leh middle school zir rual an ni ber a, sikul hi an lut deuh vekah ngaih a ni.
Raltlan hnuhnung ber, Damdep II-a lut, July ni 8-a Chamdur P hruai thlente kha an inrem fel tan a, member 66 awmna chhungkaw 22-te chu Chamdur P-ah an awm ang a, mi dang 60, chhungkaw 18-te chu khaw dangah an kal tawh.