Ram chhan ngam thalai kan tam
– Lalchhandama Ralte
Mi thenkhatin kan ram thalaite chhe vek tawh anga an sawi thin chu a dik lo tih sawiin, ram leh hnam chhan ngam thalai kan la tam tih MLA Lalchhandama Ralte chuan a sawi.
Thawhlehni zana Sakawrdaia neih tan YMA Inkhawmpui Lian vawi 75-na ‘Palai Lawm Zan’ a hmanpuinaah Tuivawl bialtu MLA Lalchhandama Ralte chuan, platform thenkhatah kan ram a chhe vek tawh, kan thalaite pawh an chhe tawh tia zirtirna him lo leh thalaite tibeidawng thei tura thusawi an awm fo thin tih sawiin, “Zaninah heti zat thalai rual ram leh hnam tana ding ngam kan la awm hi a ropuiin a lawmawm takzet. Thalai tlemte kawng dik lo zawhte avanga kan chhe ta vek anga sawi hi a him lo,” a ti.
Mizoram mipa population kiam chak lutuk chu buaipui tham a ni tih a sawi a. Kumina Economics & Statistics departmen-in data/ statistic chi thum a tihchhuah zirchian chuan, kum khat chhunga mitthi zaa 35 chu hmeichhia an nih laiin, mipa zaa 65 an ni. Kum 10 chhunga nau piang zaa 51 mipa leh hmeichhia zaa 49 an ni. Mitthi zinga zaa 42 chu thalai kum 15-54 inkar an ni a. Heng thalai thi sawi zinga zaa 75 chu mipa an ni tih a sawi.
Rambuai avangin hmar tlangdungah hun rei tak chhung YMA a ding thei loa, development pawh a lut ngai lo tih bialtu MLA hian sawiin, “Hmar thimpui tih tawngkam kan hre thin. Remna leh muanna awm hnuah hmasawnna a lo lut zel a, Sakawrdai khawpuiah ngei YMA Inkhawmpui Lian kan thleng ta mai hian hnuk a tiulh thei a ni,” a ti.
Kan ramah leh hmar tlangdungah hmasawnna a lut zel dawn tih a sawi a. Act East Policy an tih chu hmar tlangdung ngei pawh National Highway 02 leh 306A kaltlangin kawtchhuah thar an la ni dawn tih a sawi. Kan hnam himna tura inven kawngah leh ruihhlo do kawngah theihtawp chhuah turin YMA member-ten mawhphurhna kan nei tih a sawi bawk.
Ram chhan ngam thalai kan tam – Lalchhandama Ralte
