Mizoram chu chhengchhe tak niin lang mah se, Pathianin chhan neiin min pe tih chief minister Zoramthanga chuan a sawi a. A chhunga thil awmte hmangin ram hausaa siam theih a ni tih a sawi.
Inrinnia Govt. Serchhip College Administrative Building sak tur lungphum a phumnaah chief minister chuan Mizoram chu thlirna thenkhat atang chuan tlangram kalpawh harsa tak, tihhmasawn dawn pawha hautak tak anga ngaih theih ni mah se, hmasawnna potential tha tak a neih thu leh ram min petuin min pek chhan a awm a ni tih ngaihtuahin, ram hausaah kan siam thei a ni tih hre turin a sawm.
Serchhipa hmasawnna tur hmachhawp pawimawh tak tak awmte chu tha taka bawhzui a nih a, midang tan entawntlak an nih ngei a beisei tih a sawi a. Serchhip College-in hma a sawn dan leh tihchangtlun kawnga an inlungrualna chu fakawm a tih thu a sawi bawk.
He building hi Special Assistance to States for Capital Investment (SASCI) atanga sum sanction nuai 650 hmanga sak tur a ni a. Kumin February 27 atanga sak tan tur niin, kum hnih chhunga zo tura ruahman a ni. Chhawng li awmin, chhawng tinah hian department hrang hrang staff room bakah college leh zirlaite kaihhnawih pawl leh pawimawh dangte awmna tur room ruahman a ni.
Chief minister hian Serchhip Bazar-a vantlang hmun a zauh zawkna’n PWD quarters awmte sawnna tura ruahman chu a hmunah enin, quarter sakna hmun tur remchang leh bawhzui ngaite PWD hotute nen an sawi ho a ni.
Ram hausaah kan siam thei – CM
![](https://theaizawlpost.org/wp-content/uploads/tap_logo-min-large.jpg)