Ram hruaituten Mizoram State Day lawmpui
India ram hruaitute bakah political party lian hruaitute chuan Mizoram State Day vawi 39-na thleng an lawmpuina thuchah an siam.
India President Droupadi Murmu chuan a social media account kaltlangin Mizo mipui hnenah State Day chibai a buk a, Mizorama chengte chu hnam ziarang mawi tak nei an ni, tiin, ram hmasawnna tura tha an thawhna hrang hrang chu hlu a tih thu leh hma sawn zel tura a duhsak thu a sawi a ni.
India Vice President CP Radhakrishnan chuan Mizoram chu khuanu kutchhuak mawina tam tak awmna hmun a ni a, a ramngaw mawina leh a boruak thiang tak chu India inchhuanna a ni, tiin, remna leh muanna avanga a hmingthanna chu chhunzawm zel turin a chah.
Prime minister Narendra Modi chuan Mizo hnam ziarang leh nunphung mawi tak chu mipui hiptu a ni a, tualchhung inrelbawlna tha tak leh inunaua tha tak bakah midangte zahtawn taka an awm chu chhuanawm a tih thu a sawi a. Ram hmasawn ruala hmasawn zel turin a chah a ni.
Union Home minister Amit Shah pawhin Mizoram Statehood Day chibai bukin remna leh muanna avanga an hmingthanna chu chhunzawm zel turin a chah a. Union Health minister JP Nadda chuan Mizoram State Day chibai bukin, Mizoram mawina leh mipui thawhrimna chu chhuanawm a tih thu a sawi a, state hlim thei tak leh midangte inngaihsakna hmun a ni chu chhuanawm a tih thu a sawi.
Parliamentary Affairs minister Kiren Rijiju chuan Mizoram State Day chibai bukin, Mizo nunphung leh hnam ziarang mawi tak chu chhuanawm a tih thu a sawi a, ram tana ke pen zel turin a sawm a ni.
DoNER minister Jyotiraditya M Scindia chuan Mizo mipuiin state ni tura an thawhrimna chhuanawm a tih thu a sawi a. Remna leh muanna avanga an hmingthanna chu hlu a tih thu a sawi.
Lok Sabha-a leader of opposition Rahul Gandhi chuan Mizoram State Day chibai bukin, Mizo hnam ziarang leh nunphung mawi tak chu chhuanawm a ti a, state chhunga mipui inlungrualna chu chhunzawm zel tha a tih thu a sawi a ni.
Ram hruaituten Mizoram State Day lawmpui
