F. Lalremsiama
Chaltlang
8415994340
Vawiin chu Kalphung Tharah Chulhnu Sulhnu leh Lunglen ka suartluana, a tak ramah leh Thu Tharah ka sirsawn vel a, Ni a tawi duh hle mai. Fate hmangaih leh Ram hmangaih kan sim thei (phal) si lo a! “Kap- hleia Kamchhuak Kimchang” leh an khuaa amah “Hriatrengna Lungphun” buatsaihtute fakin awm rawh se. Ani chuan an khua Tachhip atang te, phai vairam atang te, Durtlang Damdawi in kianga “Inte Thawveng” atang tein THLIRTU a din a…. Natna chhe ber tuar chung pawhin, a zam lo!! Ka insum zo lo tep. Ka va Zopa lo em. Kan va inthlau tehreng ve le! A dam chen let li (4) vel lai damin, Pathian hmangaihna leh lei malsawmna ani dawn let tam tak, chhiarsen loh dawnga hi, kei hi ka va nep si! Ka Pa lo em mai, Thu Tharah zawk.
Ni khat thilthua Thu Thar min tihlim deuh mai lo thleng chu: Zemabawk cancer Hospital-ah, Zo-Fest 10-na MZP te buatsaih West Phaileng-ah leh, ZORO te Identity Card buatsaih, Assembly Speaker Release te kha maw le! Heng hian alawm Lawm Lungrual Buh hmun thlo, a sir tawn tawna tlangval chak leh taima ten hma an dawm/chhawp chhoh chhawk anga awmhmun Randangan ka lo sirawnpui ve chu! Tunlai thangtharteho lah chuan an hrethiam awm teuh lo hlawm si a. Politik sirsawn an hmuh (kan hmuh tir) te nen hi chuan a inang lo buru si a!
Thu Thar (News) – ah leh A tak ramah chuan, Kalphung Thar ka lo hmu a, ka lawm hle mai! BERAW TLANG CANCER tuarte Enkawlna Damdawi Inah chuan, Health Minister, Pi Lalrinpuiin Cancer zai theihna OT 3 (a lian 2 leh a te 1) leh ICU (damlo zual 7 dah theihna) te a hawng. Mithiam leh Hmanraw thate nena thuam nghal tur chu! Saw raltiang tlangah sawn, Hranghlui Dr. Silver-a, Rajya Sabha leh Lok Sabha-a MP ni tawh, Central Minister-a Mizo kan neih theih awm chhun (vawiin thlengin), Medical Doctor lehnghal, Sap Doctor Stockley-a Serkawn Hospital a thlak theitu hmasa ber, Cancer Hemna Khawl DAHTU hmel kha i thlir ang aw – a lanna tlang ngei atang hian! A thil tih that zawng zawng theihnghilh suh u. A sir kil hla lutuk loah sawn Dr. R.Lalthangliana leh JICA (Japan) hmu tel hram ta che. Cancer Super Speciality thupui vai hmasatute kha! Assam Rifles hmunpui thar tur sawi tei vet ninawm ai chuan BERAW TLANG bawr vel sawn ka lunglai a kuai fe zawk. RIPANS, chi tin hnam tin, tawng tin (deuh thaw) an danglam lohna Tourism leh Art and Culture te Culture Centre leh Convention Centre te sawn! Beraw lui kawng chhaka lo khawhthla leh a thlang lawka “Tuitling Bar” tui tih danglam awmna te kha mitthlain ka thlir thin nia. Tak che hian min lo ti mai rawh, ka phu ve tawk. Kal hmasa te Thil tha tih, phur tak leh thahnemngai taka chhunzawm vatna Kalphung Thar, Pi Lalrinpuii hmela lo lang nghal hi hmuh hmaih phal suh! Ani chuan a hma fe atang daih khan, mizo lungna zai ngai, zaina senso tur nei si lo hote tan, India chhim lam khu tah, khu tah daih maia Khawngaihtu Damdawi in lian leh tha puna Thurualpuiin Lungna 20 chuang fe te zaidamna an lo thlen tawh kha i hre thar thin mawlh teh ang u. Thil tha tih hi i ning lo ang u, kan inthlahdah loh chuan, a hun takah RAH |HA kan seng zel dawn sia!
Thu thar lawmawm dang chu, kan CM Pu Lalduhoman MZP buatsaih, ZO FEST 10-naa a thusawi, Nupa fa 3 leh a aia tam hringte tana Hamthatna duan an rilruk thu a sawi kha huaisen takin kalpui nghal se ka ti, fimkhur ngaiin ka hre ve lo. Kohhran hmalak mekna Tawk rih ka ti ve lo tlat pek. NDA note SIKKIM sorkar pawhin Central Sorkar hmakhalh daihin, nau neih chawlh (maternity leave) sei an puan daih tawh kha, Anni pawh tlem inti, pun duh ve tho an nih khu! Kan Chief Minister ni tam ber, rei ber, Congress hruaitu hlun Pu Lal Thanhawla thusawi hi i hrethar theuh teh ang u. Vawn tlat atan a tha maithei. Chu chu, “Vaiho hi chu kan hlauh poh leh min tham loa, min hmusit a, min zuam zual zel a, kan hlauh loh poh leh min pawisaa, min vengthawng zel zawk” a tih kha. A taka ka tawnhriat ve ngei, ka pawm ve thin fo zuk ni pek a! Dawihzep kan tlanchhiat hian min um min um hian ka hre tlat thin.
Thudang lawmawm riau nia ka hriat chu Speaker-in ZORO buatsaih ZO identity Card a release kha a ni. UNO berin Human Rights(1948) hnua Indigenous Peoples-a kan chanvo ve tur, Pu R. Thangmawia te lungkham Ram kha ka thlir ve thin, Dai loin ka la ai lum ve reng ania aw! Capt. LZ Sailo (Padma Bhushan) Insuihkhawm Zairel hmasa te leh “Ai ka laih saih” te nen a tawk chauh si lo! kan EAM te kan NSA te tan a rimawi ve lo mai thei. IB (SIB), RAW, SSB – ah ka awm ve hauh lo, IPS hlui (Retd) chu ka ni ve. Hei ber zawk hi chu, |henawm Manipur State leh NE State dangte en hian kan fimkhur leh fin thiam a tul ka ring. A sei leh ta viau maia, ninawm ka hlau leh ta. Ka hriatsa tlem leh ka hriat thar tlem te mai si hi sawi duh ka va la ngah tak em!
Hlawm khat chauh. I han bawkkhawm lawih mai teh ang. Thlahte nei ve hman loa mual liam ka ui ve em em “Pu” ka tih duh si mi 3 hming chauh ka ziak chhuak e. Pu Kaphleia, Pu Lalbiakliana (s/o Rev. Liangkhaia) leh Pu Lalchungnunga (s/o Pu Thanga) Pi Lalsangpuii BA, BT nuta pa, Tlawng lui (Ashmani Dar Suara) tlahlum ta te kha. |halai mithiamte hian chhui theiin rawn ziak thei se ka duh mang e.
Hre tlem hi ka va inti thei thin em. Ka theihnghilh tam tawh lawi bawk si! Amah Pu A Thanglura te lahin, “Ka theihnghilh zat pawh hre lo hi a tawng thei thei a pawr pawrah an tang hlawm a” a ti ve then bawk si! Hlawm khat nep chuang loin ka khar dawn. In nin ka hlau si.
Ih maw, Chhim lam Pawih Lal Dokulha, Sailo Lalnu Ropuiliani, Fanai Lal Zakapa te! Laldang chhuantlak an lo lang sup sup! A leng rih lo si. Rani Gaidinliu te, Tirot Sing te chu hre ve tehchiam lo mah ila pawi pawh ka ti ve lo e.
Heti hian khar leh rih phawt mai ang. “|hat hi a tha reng. Hmuhsit leh Diriama awm hi a hlauhawm ber” tih hi!