Ram kangin Greece a tibuai, mi tam tak insaseng

Ram kangin Greece a tibuai, mi tam tak insaseng
Greece chuan an ram chhung hmun ngaa ram kang nasa tak an buaipui mek a, an khawpui, Athens hmar lam km 30 leka hlaa kang nasa zual hnaiha mi cheng tam tak an sawn chhuak tawh.
Thing kang rimte chu Athens laili thlengin a hriat tawh a, Greece chuan European Union chu a kan kai zel lohna tura pui turin a ngen tawh.
Khaw lum uchuak tak a awm mek laiin ram kang hian a tibuai a. Pathianni khan khaw lum lam chu 44°C a kai hial a, kar thar tir thlengin khua hi la lum chhunzawm tura ngaih a ni.
“Kang thelhtute an inhliam a, nunna tam tak derthawngin a awm a, bungrua kan hloh va, ramngaw zau tak a chhe tawh,” tiin Greek Climate Crisis & Civil Protection Minister Giannis Kefalogiannis chuan a sawi.
Thli na tak leh khaw lumin ram kang hi a pui nasa a. Greece hian EU Civil Protection Mechanism hnenah kang thelhna thlawhna paruk pe tura ngenna a thlen tawh.
Athens awmna, Attica region-a Inrinnia Afidnes-a kang tan chu a inman kai chak hle a, Drosopigi, Kryoneri leh Agios Stefanos-ah kai tawhin mi chengte an tlanchhia.
Fire service chuan a hma lam chu an timit thei tawh tih an sawi a; mahse, kang zel tur a la awm tih an sawi a. Helicopter leh water-bombing aircraft nen kang thelhtu 200 chuangin an bei mek.
Evia thliarkara Pissona bula kang mek chu ‘thunun loh’ a la ni tih sawiin Afrati panin chak takin a kang mek.
Kangmei hian pylon leh power line a kan chhiat nasat avangin Pournos leh Mistros bakah khaw tam takin electricity an nei lo.
An kan avang leh meikhu an hip nasat lutuk avangin lang thelhtu paruk damdawi inah hruai an ni tawh a, mi 115 dangin kang hi an la thelh mek.
Kythira thliarkar hmun zau tak a kang bawk a, mi chengte chuan ‘chhiatna nasa tak’ tiin an sawi a. Mi tam tak an insaseng a, coastguard leh mi mal lawngleng hmangin Limnionas vaukam atangin mi 139 chhanchhuah niin Kapsali lawngchawlhnaah dah an ni.
Inrinni atang khan Messinia-a Polithea ram a kang thar bawk a, tlai lamah chuan a nasa tawh hle.
Greece-a 112 system hmangin khaw tam taka chengte hnenah emergency alert panga thawn chhuah a ni a. Thli na lutuk avangin kang thelh hi a harsa zual a, a thelhtu 84-in lirthei 30 leh thlawhna pasarih hmangin an bei mek.
Crete-a Chania region-a Temenia-ah pawh kang awmin hmun hnih atanga intan a ni a, a inman kai chakin in pahnih a kang chhe tawh.
Thuneitute chuan Ionian Islands, Western Greece, the Peloponnese, Central Greece, Attica, Epirus, Western Macedonia (Florina, Kastoria, Kozani), Eastern Macedonia leh Thrace (Evros), Thessaly (Magnesia, Larisa, Trikala), South Aegean (Rhodes) leh Crete-ah te ram a kang thei tih inralrinna tihchhuah a ni bawk.
Thla hmasa khan Greece-a thliarkar lian ber pangana, Awgean hmar lama Chios-a ram kangah ram hectare 4,700-a zau a lo kang chhe tawh a. July thla tir khan Crete thliarkara khualzin 5,000 chuang insaseng ngaiin a lo kang tawh bawk.