Ram panga tlawh turin Modi a zin chhuak
Prime Minister Narendra Modi-a chu ram panga tlawh turin a zin chhuak a, ni riat thang tur niin kum 10 dawn hnua a zin chhuah rei ber a ni ang.
Modi-a hian Ghana, Trinidad & Tobago, Argentina, Brazil leh Namibia a tlawh dawn a. “Ram leh ram inkar, ram dang tam zawk nena kan inkar leh hun pawimawh hrang hrang hmang turin Ghana, Trinidad & Tobago, Argentina, Brazil leh Namibia ka pa dawn a. Khawvel ram dang hruaitute nen kan khawvel that zelna tur kan sawi ho dawn a ni,” tiin prime minister hian thu a chhuah.
Ram panga a tlawh turah Ghana tlawh hmasa berin kum 30 dawn hnua Indian prime minister zinga tlawh leh hmasa ber a ni dawn.
Ghana hnuah hian Trinidad & Tobago a pan zui ang a, hei pawh hi kum 27 hnua Indian hruaituin thliarkar ram a tlawh lehna hmasa ber a ni ang.
Caribbean-a hun a hman zawhah Modi-a hian President Javier Milei-a sawmna angin Argentina a pan ang a. Argentina pawh hi kum 57 hnua ram pahnih hruaitute an inkawm lehna hmasa ber tur a ni ang.
Argentina atang hian a tih tur pawimawh ber pakhat, BRICS 2025 Summit-a tel turin prime minister hian Brazil a pan zui dawn a. Hun a hman zawhah Namibia panin kum 27 hnua Indian prime minister tlawh leh hmasa ber a ni ang.
Namibia-ah hian Modi-a hian President Netumbo Nandi-Ndaitwah kawmin parliament-ah thu a sawi bawk ang.
Tun tuma Modi-a zin chhuak hi prime minister a nih tawh chhunga kum 10 dawn hnua a thang rei ber a ni dawn a. Tum khata ram panga tlawh hian kum 2016 khan a lo zin tawh a, hemi tum hian United States, Mexico, Switzerland, Afghanistan leh Qatar a tlawh kual a ni.
Ram panga tlawh turin Modi a zin chhuak
