Ram pathuma Zofate inrawnkhawm Insuihkhawmna thu UNO-a thlen tum

Ram pathuma Zofate inrawnkhawm
Insuihkhawmna thu UNO-a thlen tum
India, Bangladesh leh Burma-a Zo hnam chi peng 27 chu Aizawlah an thukhawm a, United Nations Organisation-a Zofate insuihkhawmna tura thurolum thlen an tum chu an duangfel.
ZORO president R Sangkawia chuan Zoram hi Zofate ta, kan chenna tura Pathian min pek a ni, tiin, khawvelah ram dang kan neih loh avangin venhim ngei ngei a ngai tih a sawi. “Kum tam tak kan intlawhpawh tawn loh avangin unau kan nih pawh inhriat loh chang kan nei a, chenna a hran avangin unau kan nihna a bo chuang loa, thisena inzawm tlat kan nihna pawh a bo chuang lo. Min thendarhtuten India, Burma leh Bangladesh-ah min thendarh mah se, thlahtu thuhmun, nunphung thuhmun, serh leh sang inkhawihpawlh, thih leh ruam khatah ti thin unau dik tak kan ni,” a ti.
ZORO general secretary L Ramdinliana Renthlei chuan inlungrual a tulna sawiin, Zofaten kan awmna ram theuhah nasa taka beih kan tawk hlawm a, keimahni kan tangrual tha lo hle tih a sawi. “Unau leh unau kan inbeih chang pawh a awm a; kan inlungrual a, kan tanruala kan hneh mai theih kan hmelmate pawh kan hneh lo fo thin. Khawvelin a ngaihsan chu hnam tangrual, hnam inlungrual tak hi an ni. Hnam zahawm kan nih a, khawvela kan dinchhuah ve theihnan kan tanrual a, kan inlungrual a ngai a ni,” a ti.
ZORO Western Zone president Lalnunfela Chawngthu chuan UNO-a a kal chungchang report a pe a. UNO hian anmahnia affiliation nei ZORO chu an lo ngaipawimawh hle a, a rin phak bakin an lo ngaipawimawh tih a sawi. ZORO behchhanin UNO kaltlangin Zoramin dinchhuah hun a la neih a ring tih sawiin, “UNO hian Zofate chu thukhat vua a, lungrual taka kawngkhat zawh turin min ti a; chuvangin UNO-ah hlawm khatin thu kan thlen a ngai a, chumi tur chuan kan inlungrual a ngai,” a ti.
Zofate inrawnkhawmnaah hian Burma, Bangladesh, Manipur, Tripura, Assam leh Mizoram atangin an tel a. Zo hnam chi peng hrang 27 atangin palai an tel bakah Myanmar Zofa MP leh MLA 7 an tel bawk. Kalkhawmte hian thurolum an pawm a. Zofate (Chin- Kuki- Mizo) chu thlahtu thuhmun, tawngkhat hmang (same language – different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau kan ni a. Unau kan nih angin inthen thei kan ni loa, lungrual tak leh kan insuihkhawm leh theihnan hma kan la zel dawn, tia thu dah a ni.
ZORO-in Zofate India, Bangladesh leh Burma-a awmte insuihkhawm lehna tura hma a lo lak tawhna leh UNO a lo dawr tawhna zawng zawng chu lawmawm an tih thu an sawi a. Kum 2004-ah ZORO hi UNO-in Zofa zawng zawng aiawhin a pawm tawh a UNO-a thu thlen tur reng reng chu ZORO hminga thlen thin tawh nise, UNO-a thu thlen tur nei chuan ZORO Gen. Hqrs hriattir thin nise, an ti.
‘Zofate India, Bangladesh leh Burma ram hrang hranga thendarha awmte hian kan insuihkhawm leh theihna turin UNO-ah memorandum thehluh tha kan ti,’ an ti bawk.