India ram pawna hna hmuh sak thei nia social media lama hna zuar thinte lakah fimkhur a, zirchiang hmasa thin turin police-in mipui an chah.
Mizoram Police thuchhuah danin, tunhnai khan mi pakhatin Facebook page “Hnaruak Post na leh Zawnna” tihah South Africa a thla hnih chhunga tum khat kal a Rs 50000 hlawh theih a ni tih post in hna a zuar a, passport pawh an siamsak theih thu a post tel bawk.
Hetiangah hian kum kalta khan mi tuten emaw tawhsual an lo tawh phah tawh a. South Africa-ah kaltirin bungrua, lehkhabu, food supplement leh thildangte South Africa atangin India-a phurh chhoh tir tura tih an ni a. Mahse heng an thil kenah hian dan phal loh, heroin phumruk a ni tih finfiah a ni.
Hei vang hian Mizo thalai thenkhatte chuan man an tawh phah a, tunah hian Africa-a jail-a tang mek pawh an awm tih police hian an sawi a ni.
‘Mipuite social media-a rin ngam loh thil post-te awih mai loa, uluk taka zirchiang phawt tur leh misualte buma awm lo turin kan chah nawn a. Hetiang hria chuan cyber helpline number 1930 ah hrilh emaw www.cybercrime.gov.in leh Cyber Police Station Aizawl emaw Police Station hnai berah ziakin report tur a ni,’ thuchhuah chuan a ti.
Ram pawna hna zawrhah fimkhur turin mipui chah
![](https://theaizawlpost.org/wp-content/uploads/tap_logo-min-large.jpg)