Ram pawna lehkha zir leh hna thawk tura agency lem kaltlanga kalte buaina leh Mizorama raltlan chungchang chu Ministry of External Affairs joint secretary, Protector General of Emigrants Surinder Bhagat leh chief minister Lalduhoma ten an sawidun a. CM hian ram dan bawhchhia raltlan chungah an khauh dawn tih a sawi a ni. Placement agency lem, ram pawna dan loa hna thawk tura thawn chhuak thinte leh chu’ng agency-te license tihtawp a nih tak dan, an prosecution sanction pawh Protector General of Emigrants lama dil mek a nih thu a sawipui a. China-a Mizo nula pakhat leh tlangval pakhat, MBBS zir tura kal, harsatna han tawk ta te leh Myanmar atanga raltlan lo lut biometric-a chhinchhiahna kalpui tan a nih dan bakah Taiwan-a India sawrkarin thalai hna thawk tur thawn a tum dan pawh an sawidun.
Myanmar raltlante chungchangah chief minister chuan, tha taka rawn tlan, thuawih taka awm an awm a. An ram buai chhuanlama ramri kana teikual thin, ram dan rawn bawhchhiat ching an awm tih a sawi a. Heng dan bawhchhiat ching lakah hian khauh takin hma an la dawn a, ramri rawn kante chu an cham chhung chuan Myanmar sawrkar identity card laksak/ kawlsak (deposit) zel mai thain an hria tih a sawi a ni.
External Affairs hotu hian placement agency lem hoin ram pawnah India mi an thawn chhuak a, chu’ng mite hmang chuan India mite rawn bum (scam) an tum leh a, a buaithlak thin hle tih sawiin, ram pawna hnathawh tum thalaite an fimkhur a ngai hle tih a sawi. Taiwan-a hna thawk tur lakna chu sawrkar laipuiin a kalpui thuai a ring tih a sawi bawk.
Chief minister nen an inkawm zawh hian Ministry of External Affairs leh Mizoram sawrkar indawrna thil pawimawh dang sawiin Surinder Bhagat hi Mizo Diaspora Cell hotute leh commissioner & secretary to chief minister Vanlaldina Fanai nen an inkawm zui a ni.
Ram pawna kalte buaina sawidun Raltlante lakah kan khauh dawn: – Chief minister
