Ram pawnah La Liga leh Serie A match khel dawn

Ram pawnah La Liga leh Serie A match khel dawn
Europe league lian hote khuan an league tihlarna leh huang zauh zelna bakah sumtuakna ni pahin ram pawn, a bikin, USA leh sum ngah Arab rama league match khelh an intihhmuh chho zel dawn niin a lang a, tunah pawh Spanish La Liga match khat chu Miami khawpuiah khelh a ni dawn.
Ram pawna top flight match khelh phalna hi UEFA hnena dil ngai a ni a, Europe football thuneitu sang ber chuan tunhnai kan LaLiga match leh Serie A game khat ve ve chu ram pawna khelh a phalsak a; US khawpui lian pakhat Miami lamah Barcelona leh Villarreal an inhmachhawn thei dawn ta a ni.
Spanish football federation (RFEF) president Rafael Louzan chuan kumin kum tawp lama Miami khawpuia match khat khel tura La Liga thutlukna siam chu football tana tha tak a nih thu leh ral atanga an league lo thlir tang tang thin international supporter-te hnena lawmman an peklet ve theihna hun remchang a nih tel thu a sawi.
Spanish La Liga match hi kumin December ni 20-ah Hard Rock Stadium-a khelh tura ruahman fel tawh niin, tuipui rala official European league match dawltu stadium hmasaber a ni dawn.
Barcelona player ropuiber Lionel Messi chuan Paris St-Germain lama season hnih hun a hman hnuin kum 2023 khan Inter Miami a zawm a, tun thlengin Miami hi a home a la ni zui ta zel a, a club hluiin Miami khelmual an lut tur pawh hi Messi vangin a thawm a len belhchhah ngei a rinawm.
Italian football federation (FIGC) ruahman anga ram pawna Serie A game khel tur team pahnihte hi AC Milan leh Como niin, an innuaina tur hi Australia ram khawpui pakhat Perth a ni a, nakkum February thlaa khelh tur niin, a ni tak erawh tarlan mai theih a la ni lo.
Ram pawn daiha league match suanchhuah hi duh lo leh dodaltu an awm ve reng a, chu’ng zinga langsar ber chu Real Madrid niin, Spanish giants hian khawmualpui hran daiha league match va nghah ngawt chuan nakkin zelah nghawng chhe tak a nei thei dawn niin an ngai a, football khawvel tan a tha hlawl lo niin an thuchhuah siamah an tarlang!
Barcelona president Joan Laporta thung chuan an hmelma lian ber Real thlir dan ep chiahin Miami-te ang khawpuia FC Barcelona-te ang club hrawlin competitive game an khel tur chu great show a nih tur thu a sawi!
Catalan club hi Miami khuaah an mikhual lo a, he khawpuiah hian pre-season friendly match li khel tawhin, a hnaivai ber erawh kum 2022 kha a ni duai tawh thung.