By Rinfela Zadeng
Kan sawi fo tawh a; kan sawi nawn leh ang. Mizoram hi Kristian ram kan ni a; chu chu keimahni leh khawvelin min hriat dan a ni a. Kristian te chu Bible zirtirna ringtu, Bible-in awm dan tur leh nun dan tur min zirtir anga nung tura mawhphurhna nei kan ni. Bible zirtirna hmanga kan nun dan tur kawng hrang hrang zingah – ram rorelna/politics huang chhunga kan mawhphurhna te kan sawi nawn leh dawn a ni.
Thuthlung Hlui leh Politics
Thuthlung Hlui kan chhiar chuan, Israel fate chuan an ram leh hnam kaihruaitu tur atan lal leh roreltu te an nei thin tih kan hmu a. Chung an lalte leh roreltute chuan Pathian thu an awih chuan an hmuingil a, Pathian an hawisan erawh chuan an ram a tluchhia a, salah te an awm thin tih kan hmu. Heta tanga lang chiang em em chu – ram leh hnam rorelnaah hian Pathian hi a thu ber a, roreltute leh lalte pawhin Pathian thu awih chunga rorelna an lekkawh chu an tihtur bulpui ber a ni tih hi chiang takin kan hmu bawk.
Zawlneite leh politics
Thuthlung Hlui zawlnei tam zawkte hnathawh hi ram rorelna tha a awm theihna tura Pathian thu hmanga mipuite leh roreltute an zilhhauna a ni tih kan hre vek awm e. An sakhaw nun tlabal tak leh an ram rorelna tha lo kha nghet takin a inzawm tlat a. Ram hruaitute an that loh chuan an sakhaw nun thlengin a tuar a, chuvangin ram rorelna leh mipuite kha Pathian thu anga nung turin zawlneite khan an zilhhau a, hremna an tawh tur thlengin an vaukhan tih kan hmu a nih kha.
Zawlnei Nehemia te, Amosa te leh Mika te pawh kha ram leh hnam inrelbawlna tha awm tura Zawlnei hna thawk an ni. Josepha leh Daniela te pawh ram inrelbawlnaah chanvo pawimawh tak an chelh a ni tih kan hre awm e.
Ram leh hnam hmangaihtu Lal Isua
Chanchin |ha Luka ziak bung 13:31-34 kan chhiar chuan Lal Isua chuan Jerusalem khawpui sualna kha a vei em em tih kan hmu a. ESV Global Study Bible-in a sawi dan chuan Jerusalem hian Israel hnam pumpui ai a awh a ni. Israel te sualna avanga hremna an tawrh tur kha Lal Isua’n a hmuha a hriat khan a vei em em a ni. Lal Isua hian tisa leh thlarau thilah a lo pianna ram leh hnam Israel te sualna kha a veiin a manganpui tih chiang takin kan hmu thei awm e. Politics leh Sakhaw thil avanga Krawsa Lal Isua an khenbeha a thih dawnah pawh Pathian henah ngaihdam a dil sak tih kan hmu bawk (Lk 23:34).
Kan koki kan thlak mek
Vawiin Mizoram khawvela kan ram rorelna hi mi pangngai tawh phawt chuan kan vei a, a tha tawk lo tih kan hre vek awm e. Kut hnathawktu atanga Sorkar hna lian ber thawktute thleng hian kan ram politics chhe lutuk te, mi rethei leh mi hausa inkar hla ta lutuk te, mi hausa eiruin lung in a tân theih loh laia mi rethei zu zuar chu awlsam taka kan man nghal zung zung te, hausak thut tuma dan loa kuva kan tawlh ru hum hum mai te….heng zawng zawngte hi kan ningin tha kan ti lo a. Chuvang chuan kan ram rorelna khawlpui – politics atang hian ram siam that tumin hma kan la ta mek a, a lawmawm takzet a ni. Chanchinbu leh Social Media hmangtein mipuite kan au chhuak tan a, kan ram rorelna dik lo te pawh huaisen takin kan sawi lang ta siah siah mai a nih hi.
Kohhran leh mipuite mawhphurhna
Ram roreltu kan sawisel rual hian keini mipuite leh kohhran te pawh hian kan phu tawk leh kan duh tawk chiah roreltu te kan thlang chhuak a ni tih hi kan inpawm nawn fo tur a ni. Vawiina kan ram hruaitute hi keimahni ngeiin kan aiawha kan thlan chhuah leh kan ruat te an ni a, kan duhthlanna rah ngei kan seng a ni. Chu chu a that lohzia kan hrechiang tawh a, mi tha leh mi dik, ram leh hnam hmangaih tak tak tu hi kan duhin kan mamawh tawh a ni tih hi kan hre chho mek a. Chutianga insiamthat tuma kan harhchho mek hi a lawmawm hle a, Pathian remruatna pawh a ni ngei ang. Chu kan mawhphurhna sang tak leh pawimawh tak mai hlenchhuah chu kan tih tur, Pathian thu kan awihna tur kawng khat a ni.
Mi thate an lo lut mek
Inthlan kan hmachhawn leh dawn a, chutah chuan mi tha leh mi dik, kan ram hruaitu atana kan awh leh kan it te’n rorelna fawng vawn tuma politics an lo luhchilh tan te hi a lawmawmin hmasawnna ropui tak a ni. Kan ram rorelna hi mi hausa leh mi dik lo, ‘case’ nei reng te kuta a awm reng mai te hi a vanduaithlak a. Pathian tih tak tak tute kutah hian kan ram rorelna hi tlu lut tawh se la. Kan ram leh hnam hi khitah, Kristian ram ni awm rengah kan la vawrh thei a ni. Chumi tur chuan tun hi kan hun tha ber leh kan neih chhun a ni.
Thil awihawm loh leh fiamthu thawhna atan hman tlak lek thusawia intiam thin, sum leh pai dik lo taka laluta mahni hausakna atana ram leh hnam rorelna fawng vuantute hi nuaiboa, kan ram leh hnam hi Pathian thu nena min kaihhruaitu tur roreltu tha leh mi dikte thlan chhuah hi kan mawhphurhna lian ber a ni. Chu chu Pathian pawhin kan laka a duh leh a phut, kan tihmakmawh a ni tih hi hre nawn ila. Hriatna mai ni loin a tak ngeia lanchhuahtir turin hma i la nghal ang u.
Ram rorelnaah mi tha – Bible atanga thlirna
![](https://theaizawlpost.org/wp-content/uploads/tap_logo-min-large.jpg)