Ram pumah nimin atang khan Vigilance Week hman a ni a. Mizoramah pawh Chief Secretary hovin Mizoram sawrkar hnathawkten rinawm tura thu tiamna (integrity pledge) hun an hmang a. Kumin thupui atan hian ‘Hlemhletna hnawl la, ram tan thawk rawh’ (Say no to corruption, commit to the Nation) tih hman a ni.
Vigilance Week hi kum tin October thla tawpah hman thin a ni a, kum 20 chuang zet hman a lo ni ve ta. Chumi awmzia chu, sawrkar hnathawkte hian ram leh hnam tana rinawm taka hna thawk turin vawi 20 chuang an intiam tawh, tihna a ni ber awm e.
Vigilance Week hian thupui hrang hrang nei thin bawk mah se, a laimu ber chu “rinawmna” a ni ngar ngar. Tun tum thupui ‘hlemhletna hnawl la, ram tan thawk rawh’ tih pawh hi a innghahna laimu chu ‘rinawmna’ a ni a. Rinawmte chu an hlemhle ngai lo; taima takin hna an thawk thin bawk.
Kan state sawrkar hnuaia hna thawk mekte hian tum 20 chuang zet rinawm tura an intiam tawh hnu hian, an intiam angin an rinawmin taima takin hna an thawk reng em? tih hi inenfiah nan hmang ve thin se, kan ram hian a thatpui thei a ni.
Mi pakhat chuan, “Kan ramah hian eirukna a nasa” tiin a sawi a. “Engtin nge i sawi theih, finfiahna i nei em ni?” tiin an zawt a. Ani chuan, “Politician-te hian election campaign auhlaah englai pawhin an hmang tlat alawm,” a ti a. Eiruk do nana kawngzawh leh tawngtairual te sawi lang lo pawhin, politician-ten campaign auhlaa an hman nasat danah hian kan ramah hian eirukna a hluar hle tih chu a finfiah theih nghal a ni.
Sawrkar hnathawkte tel lovin, an hmuh loh leh an hriat loh laiin politician-te hian an eiru thei ang em? tih hi zawhna pawimawh tak a nih a rinawm. He zawhna atang hian, sawrkar hnathawkte hi ram leh hnam siam tha theitu an ni a; ram hmasawnna leh thuanawpnaah mawh an phur sang hle tih a hriat mai awm e
Ram siam tha theitu- sawrkar hnathawkte
