Ram tan four lane him ti lo
Vairengte – Sairang four lane kawngpui laih tur chu environment tan nghawng nasa tak nei thei tur a nih avangin, awhawm hle mah se, a taka kalpui loh nise an duh tih Association for Environmental Preservation (ASEP) chuan an sawi.
ASEP Gen. Hqrs. chuan Thawhtanni khan general body meeting neiin, ‘Winter Operation for Wildlife Conservation’ kalpui mek chungchang an thlirho a ni.
Resolution pahnih an pass zingah, Vairengte – Sairang four lane kawngpui laih tur ruahmanna awm mek chu ram environment tan nghawng nasa tak nei thei tur a nih avangin, fourlane kawngpui hi awhawm hle mah se, a taka kalpui loh nise an duh tih a sawi a. Kan ram mil tawk leh tha taka enkawl two-lane ah lungawi zir zawk chu an duh dan a ni tih a sawi.
‘Kan ram leilung pianken hian four lane meuh hi chu a zo loa, leivung paihna tur a awm loa, chhiatna a la thlen theih tur zawng zawng, kan ramngaw leh nungchaten an tawrh nasat dan tur leh kan lui leh a chhunga awm lui nungcha tinreng tawrhna thleng tur ngaihtuah hian, kan ram tan a him lo a ni tih sawrkar leh Zoram mipuiin hria ila kan duh a. Four-lane kawngpui hmalakna hi kaltlangpui a nih lohna turin theihtawp chhuah turin sawrkar kan ngen a ni,’ a ti.
Thlasik hun thleng mekah mi tam takin silai tha nen ramvah an ching leh tan a; khawpuimite thingtlang lamah thurualpui neiin an fehchhuak nasa thin tih ASEP hian a sawi a. Thingtlang unaute pawh hetianga sapel/ ramvah chingte thurual puitu ni lo tur leh ram vah chingte khap ngam turin an ngen tih a sawi.
Khawpuia chengte pawh demand siamtu ni loa, lei lo ngam turin an ngen tih a sawi a. Sawrkar chu khauh zawka hma lak turin an ngen tih a sawi a ni.
Ram tan four lane him ti lo
