Chawl loin ram tan ke an pen zel dawn tih leader of opposition Lalchhandama Ralte chuan a sawi.
Tuivawl bialtu MLA Lalchhandama Ralte hian January 9 & 10 khan a bial khaw hrang hrang tlawhin, bial mipui hnenah lawmthu a sawi a. Ram tan theihtawp chhuahin hna an thawk anga, sawrkar khalhngiltu ni turin constructive opposition hna an thawk anga, chawl hauh loin ram tan ke an pen dawn tih a sawi.
Amah thlangtu leh midang thlang zawktute pawh bial mipui an nihna anga amahah tumah inthlahrung lo turin a chah a. Sawrkar hmasain bial chhunga hma a lakna kal mekte chak taka chhunzawm zel a nih theih nan hma lak zui a nih tur thu a sawi. A tih theih anga tlanchhe loa bial tan leh ram tan a tul apiang thawh zel a tum thu a sawi bawk.
MLA hi khawtlang hruaitu leh MNF party lamin an lo hmuak a ni. An bial khaw hrang hrang hmasawnna tur leh an mamawh angte tihhlawhtlinna kawngah hma lakpui turin rawtna leh ngenna an lo thlen bawk. Palsangah hian SASCI atanga sak zawh hlim Community Hall chu Lalchhandama Ralte hian a hawng a ni.
Ram tan ke kan pen zel ang – Lalchhandama Ralte
