Ram tan Ramos chawl ve ta…
Spain defender tha berte zinga chhiar kumkhua tawh tur Sergio Ramos chuan thinlung lungchhe tak chungin interna-tional football a chawlhsan thu a puang ve ta nge nge!
2010 World Cup-a Spain champion-pui tawh, chu mai ni loa kum 2008 leh 2012 European Championship-a Spain an champion theihna’na thawhhlawk Ramos chuan a chawlh thu a puan rualin Spain boss thar Luis de la Fuente ka ngei atanga kohna a dawn tawh loh tur thu a hriat hnuah he thutlukna hi a sam ta tih a sawi.
Kum 36 mi Paris St-Germain defender hian ram tan game 180 khel tlingin, Spain player chhuak tawh zawng zawng zinga ram tana khel hnem ber a ni a; chuti khawpa sulhnu nei hraw ni mah se March 2021 atang khan ram tana khel tura kohna a dawng leh ta ngai lo a; Spain coach hlui Luis Enrique-a’n World Cup squad-a a hnawl hnu pawh khan beiseina nen ram tana koh leh hun a nghak tang tang a, mahse, manager thar ngeiin koh tumna a neih tawh loh thu a hrilhchian tak avangin a bei a dawng fithla ve ta a ni!
Ningani khan social media kaltlangin Ramos hian international football a mangtha thu hi tarchhuakin, “A hun a thleng ve ta. Tun hi kan hmangaih leh phurpui tawp theih loh national team mangtha hun chu a ni.
“Kawng zawng zawng tawp ni ka tan a inherchhuak a, ram tana han pen zui leh hram ka tumna chuan fan tawp chin a nei a, La Roja bel chunga hlawhtlinna dang han sualchhuah leh ka beiseina kalsan a ngai ta,” tiin.
Ramos hian nikum Qatar ram World Cup last 16 lama Morocco an hneh loh hnua Enrique thlaktu manager thar De la Fuente chuan telephone kaltlangin Spain team dinthar leh a tumna kawnga a ruahmannaah a tel tawh lo tih a hrilh niin a sawi a, chu thu a hriat ruala international football chawlh-san tura thutlukna siam zui ve nghal a nih thu a sawi.
“Tukin zing khan tuna coach hna chelh lai hnen atangin call ka dawng a, ram tana ka level lantir tawh leh ka hawi lam zel tur ngaihtuah loa ram tana min koh tumna a neih tawh loh thu min hrilhchiang a,” tiin a duhthlanna ngeia a chawlh hun nghahthlentir a nih loh chungchangah vuina a chh^kchhuak a, kum upa tak ni chunga ramin a thlauhthlak ve mai mai loh Luka Modric, Lionel Messi leh Pepe tihte chu a ngaisangin, a thik tel tih a tarlang tel.
Ramos hian kum 2005 daih tawh khan rawlthar kum 18 mi lek ni chungin a international debut a nghakchhuak a; kum hnih kalta World Cup qualifier inkhela 3-1-a Kosovo an hneh tum hun tawp dawna a luh kha ram tana a inlan tawpna a ni ta.
Ram tan Ramos chawl ve ta…
![](https://theaizawlpost.org/wp-content/uploads/2023/02/ra-1.jpg)