Ram tana police thite hriatrengna hmang
India ram himna atana nunna chan police-te hriatrengna leh chawimawina chu Thawhtanni khan ram pumah hman a ni a. Mizoramah pawh police hmunpui – District Headquarters leh Battalion Headquarters-ah hrang hrangah hman a ni.
Aizawlah chuan 1st Bn. MAP Headquarters Armed Veng-a Martar Thlanah Mizoram director general of Police Anil Shukla hoa hman niin, Mizoram Police hotu dang bakah Central Reserve Police Force, Border Security Force, Subsidiary Intelligence Bureaus leh Assam Rifles hotute telin, ram tana thi police te sunna hun hman a ni a, Martar Thlanah hian zahna pangpar dah a ni.
1959 October 21khan 3rd Battalion CRPF police party tlemte chu deputy central intelligence officer Karam Singh hona hnuaiah Ladakh hmuna Hot Springs huamchin, tuipui atanga feet 15000 – 16000 a sangah ramri vengin an duty (patrol) a, China sipai ralthuam famkim leh hmanraw tha tak taka thuamte chuan lo lambunin police 10-in nunna an chan a, 7 chu hliam tuar chunga man an ni.
He thil thlen hnu, 1960 kuma ‘Annual Conference of IGP of States and UT’ neih chuan October 21 chu ‘Police Commemoration Day’ atana pawm turin resolution an pass a. Chutiang chuan kum 1960 atang khan October 21 hi kumtin Police Commemoration Day atan hman thin niin, India ram humhalhna kawnga inpekna sang ber, mahni nun hlantu police martar-te chawimawina ni atan hman a ni.
2023 September 1 leh kumin August 31 inkar khan India ramah police 216-in an mawhphurhna an hlenna kawngah nunna an hlan a. 1947 August 15 atanga kumin August 31 thleng khan police 36449 chu an duty laiin nunna an chan tawh bawk.
Kumin chhung hian vanneihthlak takin Mizoram Police zingah duty laia hmelma/misual kuta thi an awm loa, kum 1966 atanga vawiin thlengin Mizoram Police zingah duty laia nunna chan 54 an awm tawh thung.
Ram tana police thite hriatrengna hmang
