Rome khawpuia khelh mek Italian Open-ah World No. 1 Jannik Sinner chuan second round a pal tlang a, ram tiam, ropuina ram panin a kal mek. Sinner a chak zel lai hian player langsar Djokovic chu Prizmic hneh lovin a tla thung.
Tunhnaia khel tha em em Jannik Sinner hian Italian Open second round-ah Sebastian Ofner a hmachhawn a, set hloh lovin a chak. An ram khawpuiah ngei Sinner hian tha takin bul a tan a, Ofner a ngam nghal hle. Game thum hloh chungin set khatna a la phawt a. Set hnihna khirh zawk hret mah se game li bak a hloh duh chuang lova, 6-3, 6-4 a hnehna changin third round a inhlangkai.
Rome-ah a champion a nih chuan Sinner hian Novak Djokovic chauhin a la tih theih Masters 1000 inelna pakuaa champion kim vek thei pahnihna a ni ang a, ‘Golden Masters’ a puitlin chiah ang. ATP Masters 1000-a a la champion lohna Italian Open-ah hian kum 2025 khan final a lut a. Hrem a tawrh zawh hnu lawk a nih vangin a elpui lian Carlos Alcaraz a hneh lo. Inelna neih mekah champion theihna hun tha tak a nei a, a champion a nih chuan hnuhma thar ropui zawk a hnutchhiah dawn.
Sinner hian ATP Masters 1000 pangaah champion zawnin hetiang ti thei hmasa ber niin Djokovic record a khum tawh a. Djokovic ropui bikna ‘Golden Masters’ tawm turin Rome-ah champion a mamawh. Thla tawp lama khelh tan tur French Open-ah champion tura rinkai ber a ni bawk a. Roland Garros-ah a champion a nih chuan Career Slam a puitlin dawn chiah bawk.
Khelh tha tluang Sinner a chak zel laiin player langsar Novak Djokovic erawh chu second round paltlang zo lovin a tla ve thung.
Grand Slam a vawi 24 zet champion tawh Djokovic hian second round-ah amah ngaisang em emtu Dino Prizmic a hmachhawn a. Awlsam takin set la hmasa bawk mah se a khingpui er let a dawl zo lova, 6-2, 2-6, 4-6 a tlawmin third round a inhlangkai zo lo. Italian Open-ah tla hma bawk mah se Djokovic hian Grenc Open a champion tura inrintawksa sang tak a neih thu a sawi.
Ram tiam lam panin Sinner
