Dan dik loa Vai sumdawng leh Burma lam unau sumdawng an tam lutuk chu a tihtawp dan kawng zawnsak turin sumdawng pawl intelkhawm chuan chief minister an ngen.
Mizoram Merchant Association (MIMA) hruaitute chuan Nilaini khan chief minister Lalduhoma hmu in, inner line permit enkawltu board hran a awm a hun hle tawh nia an ngaih thu an hrilh. ILP pek danah leh pek tawhten an ngaihsak zui loh thin avangte, an ILP dam leh dam loh an ngaihtuah zui loa, a sponsor-tute lahin an ngaihtuah zui bawk si lo, tiin an thlen.
Mizoten dan tha tak kan neih, 2 years validity ILP, hnamdang tana neih hleihtheih loh tur pawh hnamdang nei tam tak an awm tawh tih an thlen a. ILP renew loa awm ta mai mai an tam avangin, Mizoramin ILP hmanga sum a hmuh tur a hmu pha lo hleah an ngai a. Dan loa lo lut an tam tak lutuk avangin ILP Board din tul hle tawh tih an sawi a ni.
Dan loa lo lut hnamdang (Vai) chu hmun hrang hrangah sumdawngin, dawr an siam bakah Mizo hming hawhin dawr an siam a. Iron rod leh cement zuarah phei chuan Mizo hming hawha Vaiin dawr an siam hi 90 vel a ni tawha hriat a ni tih MIMA hian an sawi. Mizo zingah sum tlemte uma Vai hnena hming hawhtir tawh lo turin an ngen tih pawh sawi nghalin, Mizo hnam hralhnaa an ngai thu an sawi.
Myanmar atanga Zofa unau raltlan zingah sumdawnna khawiha sumdawng bakah ruihhlo a hluar phah hle nia an hriat thu sawiin, ‘Heng, dan loa Mizorama rawn lut, duh duha sumdawnna rawn bunte hian chhiah an pe loa, nasa takin Mizoram sawrkarin a sum hmuh tur a hmu lo niin kan hria,’ an ti a a. A tih tawp dan kawng zawnsak turin chief minister hi an ngen a ni.
Ramdangmi leh hnamdang ho dan loa sumdawng ngaimawh
