F. Lalremsiama
Chaltlang
Mb: 8415994340
Vahui dawta Tualvungi koh thiam manah, Pu H. Lallungmuana chuan Lok Sabha MP nih a hlawh! Chhan dang a awm nual tho. P.C leh ZNP inkawp Candidate-in Congress (ruling) Party Candidate Pu J. Lalsangzuala a hneh. Ani ka han sawi lan hmasakna chhan chu, kan Thupui “Ramhlui zia” tih leh “Kalphung Thar” tih tawngkam hi a sawi lar nasa hmasatu ber nia ka hriat vang a ni.
Ramhlui zia langsar hmasa bera ka hriat chu, District Council hun laia Primary zirtirtu lak chiam kha a ni. MDC – in quota an nei. Min bialtu, zar zotu kan ni ve. Middle (Cl-VI) pass zel an la tho.
VC (Village Council) thiat, Rorellai apiang khan VC an thiat teuh zel. Circle Assistant (CA) Report tlawhchhan tur an nei zel tho; mahse, mipui mimirte ngaihdanin a Fair lo hle thin!
Hun a kal chho hret hret a, Party mi leh Sate langsar taka duhsakna a zual telh telh. Aizawl – Kawngpui kama Dawrte hmun leh Inhmun semah te, khawpui chhung veng hrang hranga inhmun leh Huan – ram peknaah a HLUAR zual chho ta zel a ni.
Sorkar hnathawk lakna hrim hrimah lehkha thiam, Matric pass an pung zel a, hna inchuhna a zual zel bawk a, uchuaka Party leh laina vel induhsakna ven sen lohin a hluar ta zel a ni.
Vote – bank Politik a lo lang hma viau. Lunglei chhimthlang Tuikuk leh Takam Vote thlahlel zual riau MDC pakhat, Executive (Council) member ni thei ta te pawh an puh fal deuh. Politik tuinu a zual zel a, Party hlun leh ropui, Indian National Congress (INC) pawh a lo lut a, UT pian hmain, District Council – ah an Sorkar thei. Politik chiri a thang zel a, Chief Executive Member (CEM) an inthlak zar zar ta nghe nghe.
Zual zelin, Sikul upgrade Deficit-a hlankai, tih Sorkar (provincialized) leh a dang dang tam tak – Tehfung mumal leh angkhat aia Party lam rilru langsar taka Ruling Community chezia thuhruk theih loh kan hmu chho. Chutiang chu thlak nan “Kalphung Thar” a lo puakchhuak ta a ni.
Kan la sawi ve loh pakhat hmaih hauh loh tur chu Police Constable tam tham lak thu a ni. UT hlim khan Deptt dang angin, Police 1000 (sang) rual lai lak an nia, Fitness Test kha, tih ngai zen zen loh hmanga thlan khan sawisep/vuivai a hlawh lo. 1st India Reserve (IR) Battalion lak pawh kha Area/Region aiawh (representation) ngaihtuaha lak an ni a. Miin tha an ti tlangpui. A hnu lam erawh “Ramhlui Hrichhia” khan a ei chhe zual ta ber zawk ni awm takin, Ngawlvei, ten theih loh hlawl, kut vung ber bur te nen lam an la a, an buaipui zui hle!! Inthununna (Discipline) lamin a chhiat phah fe niin a lang bawk. Kan Thupui hrula “Habitual Offender nih inchhawk” tih pawh Polit tawng hmangin Lal inchhawk ten “Ramhlui zia” an lantir chhawk tihna mai a ni e.
Kalphung Thar chu CHANGE a ni mai. America (USA)- ah ropui takin kan hmu. S.A (South Africa) ah MINGO Lal hluar em em na, MIHANG hmuhsit leh rahbehna (Apartheid) luah lanin CHANGE a thleng tawh bawk. Heta mimal langsar pahnihte chu (i) Barack Obama, mihang (African-American) USA President chuan an Lal In ropui White House a luah ve tak kha!! U-tello, S.A-ah chuan Zalenna Sualtu Nelson Mandela chuan kum 26 lai Jail bang zut khan LUNG IN a chhuahsan ta! Amah leh mihangho zawng zawng an lo ZALEN ta! Khawvel-in Zalenna Dar an vua!! Chu chu a ni – KALPHUNG THAR chu!! Ramhlui zia a bo, a va ropui em!!
Kan ram riangte, Mizoram-ah hian nikum ral tep lai khan, Kalphung Thar hmang tur Sorkar kan VOTE chhuak ve hlawl mai. A va lawmawm em! Obama emaw Mandela emaw tehkhin vel a rem lo. Kan dinhmun a inang loa, kan mamawh a inang chiah chiah lo. Mahse a LAIMU ber chu a thuhmun lo thei lo. “Mahni hmasial loa Mipui tana HNATHAWH (Human Right – Social Justice tih puitlin) a ni. A tahtawlin, remchanna lei zelin, Zoram leh Hnam Damkhawchhuahna “HUMHIM TLAT” zelin. Rorelna fawng vuantu Sorkar leh Mipui, Mihrang leh Sahrang hmaa “Zam Ngai lo” Thlahte ni awm rengin aw!!
A tak ram kalphung Thar in dai mek, Kum a la vei lo. Thutiam tha eltiang neitu, Zoram nghahfak nia ngaih ZPM Party mi leh, Neutral leh Sorkar hnathawk lai te, Party dang mi engemawzat duhsakna vote nen, MLA 27 (2/3rds ) lawih neia Sorkar mek hian “THU” a tak tak rama mite hmuhtir hi lo lang zel sela, Thlir ninawm lo, ennawm kan nghak tih hriat theuh a tul takzet. SORKAR (Rorel, Statecraft) hi thil namai a ni lo. Tlanghriat a ni meuh mai, mahse rorel hna tak tak chu a dang zar si. Mahni khaw level-a Union |halai hruaitu Sipai sualte vuak hel, Mizo Chief Minister hmasaber leh Ramhmangaihtu Huaisen Pu Ch. Chhunga chher len, Pu Lalduhawma C.M kan nei alawm. A pu chhun se, lo GOOD MUP mai se a tha ber ang. Sawi tam aiin TIH TAM, TIH |HAT a |ha ang.
Thutiam, “Ka eiru lo ang” Lo hlawhtling ngei teh se. Kan ram leh Hnam eichhetu ber pakhat Corruption do hi thu tha eltiang a ni. Bul tantu ni tura intiam MLA 27 zet chu kum 5 chhung chauh atan pawh thlamuanpui tham a ni. A rah kan lo thlir e. Inrenchem-in a zui tak tak a ngai. Bul an tan tha fu. Sipai Pawl (S.A) lawm zawng tak (Self-Denial) a ni tak meuh mai. Chhiahpun leh AMC, LMC leh Sorkar Corporation (PSU) hotute hlawh punin a zui si a? Dr. C. Lalrampana te, Maliana, Sihphir Venghlun chhiarkawp en chuan Mingo Politik fiamthu, Robbing Paul to pay Peter tih te a ang dawn dawn?
Rorelnaah Pathian Ram Thlentir tur tih te hlei hlei hi a tha ka va ti mai mai em! State Lottery-ah te hian duh aiin a thleng har ta mah mah.
Khar chhinna. Aite chhin lailawkna tak meuh chauh. Kalphung Thar leh Ramhlui Zia a INSUAL mek. Pu Vawma, hang dum run mai nge chak ang, Pu Keia, pian thiam, zuan zang, zia rang mumal mawi tak neitu? A dum hi chu Ramhlui Zia, Politik bawlhhlawh leh tenawm uchuak nen ka hmehbel tlat. Uire, Sam inphiar zawm tih te, inmawngzawm tih te hi chu BO NGHAL rawh se!! Sap hote, Vai hote pawh khuan heti em ema thu chhia hi mahni awmna Party kalsante (defector) te tawngkhum nan an hman ka hre ve lo tlat. Thu Hlu, Brig. T.Sailo pawhin a sawi kha “Theihnghilh la, Ngaidam rawh” tiin Kalphung Thar i hmang theuh ang u. Sorkar hnathawk mek leh Pension ten a hun taka Hlawh leh Pension an la thei ta teh cheng te hi, Kalphung Thar chu a tha alawm. Kal tha reng reng teh se aw! Kan zavai tan, lungrual takin, OVER loin!
Sawi vek tum loin, Khekkhal chin neih te hi a finthlak fo zawk si a.