Ramngaw humhalh lai minister hoin fang
Thenzawl Forest Division huamchhunga awm, Sailam Ecological Conservation Society enkawl – Sailam Bird Sanctuary leh Nagar Van Yojana Scheme (City Forest) kalpui na’na ruahmanna siam mek, Sub Hqrs YMA Serchhip enkawl Serchhip dai Entlang Community Forest chu Thawhtanni khan Environment, Forest & Climate Change minister TJ Lalnuntluanga chuan a tlawh a. Thawhlehni zing khan N. Vanlaiphai Forest Division huamchhunga ramngaw humhalh kawnga hma la tha YMA Branch 12 hruaitute nen an inkawm bawk.
Sailam Bird Sanctuary a tlawhnaah minister chuan, Sailam khaw mipuiin kum 2015 atanga an lo enkawl tawh Sanctuary chu a hluin a ropui hle tih a sawi a. Khaw dang pawhin hetiang tih nachang hre zel se a duh tih a sawi. Eco-tourism leh Botanical Garden lama theihna leh hmunhma an neihte ramngaw tichhe si loa haichhuah thiam a tha tih hrilhin, hemi kawnga hma la turin sawrkar a inpeih reng tih a sawi.
Sailam Bird Sanctuary enkawl zuina atan leh tihchangtlun zelna’n minister hian Compensatory Afforestation Management & Planning Authority (CAMPA) Fund atangin cheng nuai 6 a hlan a ni.
Sub Hqrs YMA Serchhip-in hun rei tak an lo enkawl tawh Entlang Ramngaw (Entlang Social Forestry) a tlawhnaah TJ Lalnuntluanga chuan, Environment & Forest deparment hmalakna chu department bil pual a ni loa, khawvel mitinte mamawh thil tul tak a ni, tiin, “Chutiang taka hlu a nih avang chuan India sawrkar pawhin khawpui chhunga ngaw siam, Nagar Van Project (City Forest) a kalpui ta hial a. Entlang ngaw pawh hi Serchhip khawpui huamchhunga awm a nih angin, he project kalpuina’n ruahmanna thehluh a ni,” a ti.
CAMPA Fund atangin Entlang Forestry enkawl zelna atan cheng nuai 3 a hlan a ni.
Entlang Community Forest hi tunhma Serchhip khua VC pakhat hnuaia a awmlai chuan Village Reserve Forest tih a ni a, kum 1983 atang khan YMA kutah hlan niin, Social Forestry tih a ni a, YMA Serchhip Branch-in a enkawl a, 1993 atangin Joint YMA anga enkawl niin, kum 2008 atangin Sub-Hqrs YMA in a la zui a ni. An kuta a awm atangin YMA hian viltu bik tur thawktu an ruai nghal a, vawiin thlengin an la ruai a, a zau zawng hi hectare 100 a ni.
He hmunah hi research beitu zirlai engemawzatin an zirbingna behchhanah an hmang tawh a, thing leh mau upa tawh tak tak bakah ramsa leh sava chi hrang hrang an awm a ni.
EF&CC minister hian N. Vanlaiphai Forest Division huamchhunga ramngaw humhalh tha YMA Branch 12 hnenah an ramngaw humhalh an enkawl zui zelna atan Rs. 75000 theuh a hlan a ni.
Ramngaw humhalh lai minister hoin fang
