Ramngaw leh nungcha humhalh kawnga nunna chan ta te hriatrengna ni – ‘National Forest Martyrs Day’ chu Nilaini khan hman a ni a. Aizawlah pawh Environment, Forests & Climate Change department chuan State Forest Training Institute, Bethlehem Vengthlangah an minister Lalthansanga leh principal chief conservator of Forests AK Biswal hoin an hmang.
EF&CC department hian an thawhpuite duty laia thi mi 12 – Lalzawmliana (wildlife guard) Dampa Tiger Reserve; Lalsiamliana, (forester) Durtlang; Lalnunzira (forester) College Veng Aizawl; RL Zoliana, Tuikual South; Zatluanga (wildlife guard) Darlawn; K Lallawmkima (forest guard) Kolasib; Laithansanga (forest guard) Khawruhlian; Vanlaltluanga (deputy ranger) Kawnpui; B Rothangliana (chowkidar) Aizawl Zoo; C Lalrinkima (forester) Lunglei; C Lalengmawia (forest guard) Champhai leh Sangkhuma (wildlife guard) Dampa Tiger Reserve te zahna chibai an buk a ni.
National Forest Martyrs Day hi 2013 September 11 atang khan India ram pumah hman tan a ni a. September 11 hi kum 1730-a Bishnoi hnam mi 363 ten ramngaw an humhalh avanga an lal kuta an thih ni niin, hemi hriatrengnan hian September 11 hi National Forest Martyrs Day atana thlan a ni.
Ramngaw leh nungcha humhalh avanga nunna chante Ni hmang
