Mizoram State Legal Services Authority (MSLSA) leh Lunglei District Legal Services Authority buatsaih “Public Education on Legal Services Environmental Protection, Sustainable Practices and Importance of Conservation” tih thupuia hmangin Thawhlehni khan Lungleiah hun hman a ni a. MSLSA executive chairman, Gauhati High Court judge Justice Michael Zothankhuma’n a hmanpui.
Inlawmna thu sawitu District Legal Services Authority chairman, District & Session judge Vanlalenmawia chuan nasa takin kan environment pawngsual a ni tawh tih sawiin, a siamthat leh humhalh lama inzirtir a ni chu lawmawm a tih thu a sawi.
Justice Michael Zothankhuma chuan kan ram sik leh sa humhalh kawnga hma lak a pawimawh avangin hetiang hun hi buatsaih a ni tih a sawi a. Mizoram chauh nilo khawvel huapin sik leh sa a danglam a, boruak a lum zel a, mihring tan a hrehawm em em tih a sawi.
“Thil siam leh mihringte hian inlaichinna kan nei a, mihring kan pung zel a, kan ramngaw neihsa thing leh mau kan humhalh loh chuan engtik hunah emaw chuan a rem mai dawn a; eizawnna avanga loh theih loha ram kan vat a nih pawhin, duham loin kan mamawh chin bak tichereu lo ang u,” a ti.
Ramngaw chereu avanga nungcha tam tak an thih phah avanga eco system a buai phah dan sawiin, mahni tan mai ni lo, thangthar awm zel turte tana chenna tlak khawvel a awm theih nan evironment humhalh kawngah theihtawp chhuah tur leh a tichhe thei zawnga hma la lo turin a sawm a ni.
Environment humhalh kawnga inzirtirnaah hian Pachhunga University College Department of Zoology atangin Dr Vanramliana leh Project Save Tlawng member Lalthanmawii Kawlni ten environment a chhiatzel dan leh humhalh tura hmalakna hrang hrang an sawi a. Zawhna awmte chhan a ni.
Ramngaw/nungcha humhalh tulna sawi
