Mizoram State Boundary Committee chu nimin khan home minister kaihhruaina hnuaiah neih a ni a. Home minister chuan ramri him, mipuite thlamuang taka an khawsak theihna tur chu an thupui ber a nih thu sawiin, thenawm state-te nen kan lungrual tlanna tur kan zawn a pawimawh, tiin a sawi a.
Home minister-in ‘lungrual tlanna’ tia a sawi hi, mithiamten ramri buai chungchanga inbiaknaah ‘give and take’ a pawimawh tia an lo sawi thin angah khan a ngaih theih awm e.
Kan thenawm state nena kan Ramri a buai chhan chu, kan hauh chin a inanloh vang a ni a. Pakhatin ‘heti chin hi ka ram a ni’ a ti a, a lehlamin ‘heti chin hi ka ram a ni’ a tih bawk a, mahni ram chin nia hauh chin a insut buai tlat chuan ‘ramri buai’ a lo ni ta mai a. Chumi chingfel tur leh inchalrem thei tur chuan, ‘heti hian kan tawlh deuh ang a, nangni pawh heti hian tawlh deuh ula…’ tia kan inlungrualna (mutual concessions and compromises) a pawimawh ber a. Chumi rilru chu kan put loh va, mahni tanfung sahuai thing vawn tlat reng chuan engtikah mah ramri buai hi chinfel a nih a rinawm loh. Boundary Committee hian meeting vawi 100 pawh nei mah se, lungrual tlanna kan zawn miau loh chuan ramri hi a buai kumkhua mai dawn tihna a ni awm e.
Kan hriat angin, Meghalaya leh Assam chuan ramri buaina hmun 12 an neih mek atanga hmun 6-ah 2022 khan union home minister Amit Shah hriatpuinain inremna an lo ziak tawh a, kha inremna pawh kha ‘give and take’ an hman vang a ni ber awm e.
Tuna Assam lama la bet mek, kan ram chin nia kan hauh hi, a dik lo tihna ni lovin, dik em em chung siin, a thu ringawtin a dik reng ang a, a taka neih hun hi a thleng si lo ang a, ‘khuti chin khu kan ram a nia’ tia ralkhat atanga kawh leh ringawt thin hi kan chantawk a nih si chuan, chu chuan tangkaina leh hlawkna min pe dawn chuang lo tihna a ni a. Dawih vang leh tlawm vangah la lovin, hma lam hun thui tak thlir chunga, Chawngbawla strategy hi kan hman thiam a pawimawh dawn hle niin a lang ta.
Ramri-ah lungrual tlanna
