Ramri buai kal zelah Cambodia-in Thai tuialhthei lak luh titawp

Ramri buai kal zelah Cambodia-in Thai tuialhthei lak luh titawp
Thla hmasaa ramria buaina an neihna hmuna an sipai thah a nih hnuah Cambodia chuan a thenawm, Thailand atanga tuialhthei a lak luh thin zawng zawng a titawp a, kum 10 chuang chhunga an inkar a chhiat lai ber a thleng mek.
Prime Minister Hun Manet-a chuan Pathianni khan an thutlukna hi social media-ah tar langin zanlai atangin an kalpui tan.
Manet-a hian energy company-te chu an rama ‘tual chhung mite tuialhthei leh boruakalhthei mamawh phurhru tura lak luhna dang’ dap turin a ti.
Pathianni vek khan Cambodian foreign ministry chuan an khua leh tuite chu tul lem lova Thailand-a zin lo turin a ti a. Thai consular affairs department pawhin an mite Cambodia-a an mite chu ‘buaina lai’ pumpelha khawsa zel turin a chah ve bawk.
Inthenawm ram hnihte hi thla hmasaa ramri buai lai hmuna inkahna thlenga Cambodian sipai kah hlum atanga intan kha a ni.
Kum 100 chuang tawh Cambodia leh Thailand hi khawmuala km 817-a thui an inrina hi a buai tawh a, an ram map hmasa ber hi France-in Cambodia a awp lai, kum 1907-a an siam kha a ni.
Sipai thihna a thlen hnuah hian ram hnihte hian an ramri ve ve an veng uluk hle a, border checkpoint leh inkalpawhnate pawh an khar.
Ramri buaina hi Nilainia Thai Prime Minister Paetongtarn Shinawatra-i leh Cambodian hruaitu hlui, an rama huhang la ngah tak, Hun Sen-a te phone-a an inbiakna a put atangin a tang zual.
An inbiaknaah hian Thai premier hian Hun Sen-a hnenah hian tual chhunga nawrna nasa tak a tawng mek a, ‘lehlam pawl’ thu ngaithla lo turin a ti a, an thu a ngaihchan loh tur zingah hian ramria Thai sipai commander hriat hlawh tak awm mek pawh a tel.
Inbiakna a put hnu lawkah hian sorkar an siampui, Bhumjaithai Party chuan an thawhhona chhuahsan nghalin Paetongtarn-i sorkar chu dinhmun derthawngah a awm phah mek.
Hetih lai hian Pathianni khan Thai hruaitu hian an thawhpuite chuan a sorkar an thlawp vek tih sawiin an ram himna derthawng mek karah politics nghet tha a awm zel dawn tih sawi.
A thawhpuite nena an thutkhawmnaah, “Ram hian hma lam a pan zel tur a ni a. Thailand hi inpumkhatin kan mipuite harsatna hi kan sukiang zel tur a ni,” a ti.
Hetih lai hian Inrinni hian prime minister hlui, Thaksin Shinawatra-i fanu, Paetongtarn-i bâng tura nawrna kawng zawh huaihawt a ni dawn.