NGO Coordination Committee chuan Free Movement Regime tihtawp tum leh Indo Myanmar ramri hung tum chu ti lo tura ngenna ‘memorandum’ Union Home minister hnenah an thehlut.
Mizoram larsap office kaltlanga memorandum an thehluhah hian UN Declaration on the Rights of Indigenous Peoples (UNDRIP) 2007-ah India chu signatory a ni a, Article 36 of UNDRIP sawi angin, international border-in a thendarh luahtu ram leilung fate chanvo humhim zawnga hma a lak ngei an ring tih an thlen.
Free Movement Regime (FMR) tihtawp a tum lehzel leh, ramri lehlam lehlamah inthianthatna siam tum aia hung pin a tum phei chu mak an tih thu an thlen a ni.
Ramri lehlam lehlama cheng Mizote inpawh tlan zelna atan FMR hman zui zel chu thil tul a ni tih an sawi a. FMR tihtawp a nih a, ramri hung a nih bawk chuan ramri bulhnaia awmte inkara hun rei tak hnam nunphung inzawmna an neih leh inthiatthatna awm chu harsatna a thlen phah zawk an ring tih an sawi a ni.
Heng avangte hian India sawrkarin FMR tihtawp a tum leh ramri hung tum chu ngaihtuah nawn a, tipuitling lo turin NGOCC hian Union Home minister an ngen a. NGOCC hian Mizoram chief minister hnenah hemi chungchang hi a hranin an thlen bawk.
Ramri hung loa FMR titawp lo turin Union HM ngen nawn
