India leh Myanmar inrina hung tum chu Manipur chief minister N Biren Singh leh Assam chief minister Himanta Biswas Sarma ten sawrkar laipui an ngen vang a ni tih Congress vice president Lalnunmawia Chuaungo chuan a sawi.
Mizoram khawchhak lam khaw hrang hrang a tlawhkualnaa an party mite nen an inkawmnaah MPCC vice president hian, tunhnaia Delhi-a Congress hruaitu Rahul Gandhi nen an inkawm chungchang a sawi a. BJP sawrkarin Mizo hnam leh sakhua tana him lo FMR (Free -Movement Regime) tihtawp leh ramri hung tuma hma a la chu Mizoram tan a him loa, na takin an dodal dawn tih a sawi. Myanmar-a Zohnahthlak unaute leh a bul vel Mizorama chengte chakkhai inpur tawnna leh ramria insumdawn tawnna tenau a buai dawn bakah chhiat thata inkalpawha infiamna thlenga nei ho dial dialte nena kan inzawmna chhutchah tum hi a himlo tih a sawi a ni.
“Zofate kan inlungrualna chak leh tha tak tichhe tura Manipur CM Biren Singh leh Assam CM Himanta Biswas Sarma tangdunin central BJP sawrkar an ngenna vanga ramri hung tumna hi thleng a ni a. Heng CM pahnih duhdana FMR tihtawp a, ramri hung tura ruahmanna siam hi a tlawm thlak takzet. Mizoram sawrkar hian na taka dodal turin kan beisei a, Congress party chuan kan unaute nena min daidanna awm tur hi kan do tlat dawn a ni,” a ti.
Ramri hung tum hi Manipur leh Assam CM-te ngen vang – Lalnunmawia
