Ramri hung tumna duhloin ZORO-in Amit Shah lim hal

India leh Burma ramri hung tumna duhloin ZO Reunification Organisation (ZORO) chuan Union Home minister Amit Shah lim an hal.
ZORO hian Thawhtanni khan Chin Lushai Conference vawi 123-na an hmang a. Rorelah khawvel hmun hrang hranga Zofaten rorelna pakhat hnuaia awm kan duh em tih Zoram mipui ngaihdan (referendum) lak tura rel a ni a. Zoram mipui tam zawkin rorelna pakhat hnuaia awm kan duh chuan United Nations Organisation-a thlen a, rorelna pakhat hnuaia awm theih nan chak taka hma lak tura rel a ni.
ZO Inpui chungchang rel a ni a, chak taka bawhzui a Mizoram sawrkar nen tangtlanga hma lak nise tih a ni a. India sawrkarin Burma leh India ramri hrula zalen taka inkalpawh theihna dan – Free Movement Regime (FMR) tihtawp a tum chungchang leh India leh Burma hrul ramri hung a tum chu ZORO chuan tha lo a tiin a duh lo hle a, India sawrkar chu Zofate thendarh tum niah an ngai tih sawi a ni. FMR nuaibo tumna leh India leh Burma ramri hung tumna awm mek chu ZORO chuan a duh loin a dodal zel dawn tih sawiin, an duh loh zia lantirnan a meizang hlaptu bera ngaih Union Home minister lim hi hal a ni.