Ramri leh raltlan dinhmun enfiah
Central YMA chuan an president Lalhmachhuana hoin Burma leh Bangladesh nena inrina lai hmun thenkhat an tlawh a. Dan phal loh thilin a paltlang thin em tih zirin, helaia awm raltlante dinhmun an enfiah bawk.
April 2 & 3 khan YMA Tuichawng Group chuan Parva-III ah Inkhawmpui vawi 28-na an hmang a. Chawngte SDO (Civil)/ BDO Lalnunpuia Renthei chu khuallian niin, Central YMA president Lalhmachhuana chu khualzahawm a ni.
Tuichawng Group hnuaiah hian YMA Branch 11 an awm a, inkhawmpuiah hian mikhual riaklut 130 chuang an awm A thlengtu Parva-III ah hian chhungkaw 60 vel an awm a. Raltlan chhungkaw 40 vel an awm mek. Mihring cheng a vaiin 480 vel an awm a ni. Parva hi Mizoram leh Burma leh Bangladesh inrina laia awm a ni.
Central YMA president hian Central YMA atanga raltlan tanpuina cheng nuai 5 chu Tuichawng Group YMA hnenah a hlan a. Raltlan leh YMA mamawh silpouline leh bungrua engemawzat a pe bawk.
Inkhawmpui hmanpui rual hian raltlante dinhmun zirchiangin Raltlan Camp tlawh a ni a, tunah hian raltlan 180 vel an awm a ni.
Ramri vengtu Assam Rifles leh BSF nen an inkawm a, CYMA president chuan raltlante mamawh damdawi leh thildang a sawipui bakah khawchhunga cheng mipui nen thawhhona tha tak nei a, harsatna siam lo turin a chah.
Burma border Zorinpui an tlawh nghal a. Helai kawng atanga ram tana tha lo thil a lo luh leh luh loh an zirchiang. Kaladan Multi Modal Transport Project siam meka Burma ram lama hnathawh dan an en a. Helaia awm Arakan Army duty camp tlawhin an inkawm a ni.
Ramri leh raltlan dinhmun enfiah
