Ramria duty tur Protection Squad an dilna chu sawrkar laipuiin a phalsak tih Environment Forest & CC minister TJ Lalnuntluanga chuan a sawi.
Thawhtannia Conservator of Forests, Eastern Circle office building Champhai ami a hawnnaah minister chuan Champhai chu internaltional boundary-a awm a nih angin ramsa man a tam hle a, heng an ramsa mante enkawl zui zel dan turah buaina leh harsatna an tawk fo tih sawiin, heng ramsa mante hi enkawl zui an nihna turin Rescue Centre dinna turin cheng nuai 1091 sanction tihfel a ni tawh a; kar tharah chuan lung phum hman tum a ni tih a sawi.
Ramria duty tur Protection Squad chu sawrkar laipuiah dilin mi 50 chin phalsak an ni tawh a; state dang dilte zinga hlawhtling awmchhun kan ni, tiin, “Heng mi 50 hi staff indaih lohna phurukna atan hman an ni ang,” TJ Lalnuntluanga hian a ti.
Minister chuan Forest Department-in finchhuahtu a mamawh thin hle a, finchhuahna tur hria chuan thurawn pe zel turin a chah. Tuna office hawn thar pawh thurawn an hmuh atanga an neih a ni tih a sawi.
Conservator of Forests, Eastern Circle office building hi cheng nuai 105.57 hmanga sak niin, 2022 November 29 khan sak tan a ni a, kumin September 23 khan sak zawh a ni.
Ramria duty tur Forest Protection Squad dil
