Ramria khua ho tih hmasawnna
tura ruahman VVP-II zirchiang
Rural Development & Administration Department hmalaknain India ramria cheng, thingtlang khua tih hmasawnna tur chungchang zirchiang leh sawihoin Thawhtanni khan Aizawlah a kaihhnawih sawrkar hotute leh ramria duty sipai ho nen ‘Workshop on Vibrant Village Programme-II’ neih a ni.
Hmanpuitu RD&AD minister Prof. Lalnilawma chuan, VVP-II chu ram himna leh hmasawnna thlentu pawimawh tak a ni dawn tih a sawi a. Mizoramah kum 1993 chho atang tawhin Border Area Development Programme tih hmangin ramria khua ho tih hmasawnna turin hma lak a lo nih tawh laiin, tun thlenga hmasawnna kan hmuh erawhin duhthu a la sam tawk lo hle tih a sawi a ni.
VVP-II hnuaiah hian Mizorama RD Block 16 atangin, thingtlang khaw 109 chu sawrkar laipui Ministry of Home Affairs-in Vibrant Village Programme kalpuina atan a thlang a, hmarchhak state zingah Mizoram chu khaw thlan chhuah tam berna pawl kan ni tih sawiin, he programme bawhzui tur officer-te chu ramria khua ho khaw hrisel, khaw intodelh leh hmasawn an nih ngei theihnan tih takzeta hma la turin a chah tih a sawi bawk.
Workshop-ah hian RD&AD-in BADP a kalpui tawh thin dan leh VVP-II kalpui a nih dan tur power point hmangin entir a ni a. Ramri enkawltu sipai – BSF, Assam Rifles leh BRTF hotuten an hmalakna sawizau bakah Ministry of Home Affairs hotuten online/ virtual-in hun an hmang a ni.
Deputy commissioner tinte mawhphurhna tur, VVP digital portal hman dan tur, hnathawh theih leh theih loh tur thil leh thil pawimawh dang sawiho a ni.
VVVP-II hnuaiah hian a fur a thala lirtheih tlan theihna, inbiakpawhna, television leh electric connection (on-grid connectivity) chu ngaihpawimawh hmasak tur a ni a. Heng bakah hian ramri khua a chhunga chengte tih hmasawnna tur hrang hrang chi 10 dang duan a ni. BADP nen a danglamna chu, 100% sum central-in a tum tur a nih bakah inrfrastracture chauh ni tawh loin, mipui eizawnna leh hriselna, India ram laili zawka awmte nena inkungkaihna tha zawk an neih theihna tur ngaihpawimawh zual a ni ang.
8 Vibrant Village Programme hi India sawrkarin ramria awm khua tuamchakna atana hma a lakna a ni a, kum 2023 khan VVP-I tia kalpui tan a ni.
8 VVP-I chuan India – China ramria awm khua ho a huam a; VVP-II chuan India – Myanmar leh India _ Bangladesh ramria awm khua a huam thung. State 15 leh UT 2 ah kalpui tur a ni ang.
8 Kum 2024-2025 atanga 2028-2029 chhung atana thawh tura ruahman a ni a; hemi atan hian cheng vaibelchhe 6839 dah a ni. 100% central funding a ni dawn a ni.
8 Mizoramah chuan VVP-II kalpuina atan district 8 huamchhunga RD Block 16 hnuaia thingtlang khaw 109 thlan chhuah an ni.
Ramria khua ho tih hmasawnna tura ruahman VVP-II zirchiang
