Mizoram leh a thenawm state-te ramri chungchanga sawrkar dinna chu a la ngai reng a, Bengal Eastern Frontier Regulation 1875 ami ang a la ni reng tih Home minister K Sapdanga chuan a sawi.Ningani khan Home minister hian ramri hnaih lam Kolasib district a tlawh a, sawrkar department hotute, ramria duty police-te a tlawh bakah sawrkar department hotute nen an inkawm.
Ramri chungchanga Mizoram sawrkar dinna a la ngai reng a, BEFR 1875 a ni, tiin, ramri buaipuitu tur Boundary Committee din thuai an tum thu leh he Committee rawtna leh thurawn ang zelin ramri chungchangah sawrkarin ngaihtuahna a seng dawn tih a sawi.
Ram leh hnam himna atana nunna thapa duty sipaite a chhuang takmeuh tih sawiin, an hnathawh avanga Mizoramin boruak muanawm tak a nei thei chu lawmawm a tih thu a sawi a. Ramria duty sipaite chu hmun khawharthlak takah ram leh hnam him nan rinawm taka an duty avanga lawmthu hrilhin, Mizoram sawrkar thar chuan ram himna a ngaipawimawh hle a, ram himna atana thawktute pawh a theih ang ang a thuam chak zel a tum dawn tih a sawi a ni.
Home minister hian Kolasib district huamchhunga Border Outpost (BOP) pasarih – Saiphai, Saihapui V, Buarchep, Vairengte Auto Stand, Aitlang, Phaisen leh Zophai BOP a tlawh a. BOP-a sipai duty-te dinhmun enfiahin, an harsatna leh mamawh a sawipui. Department hotute nen BOP thuamthat dan tur leh ramria hmalakna tur an thlir ho bawk.
“Ramri hmun 13-ah ram venghim turin police an duty a, an dinhmun hautak zia leh harsat zia sawrkarin hria in, vawi leh khatah thuamthat nghal bur bur theih ni lo mah se, an dinhmun hrechiang lehzual turin a hmunhma hmuh hmasak a tul a. Assam nena kan inrina leh Tripura nena kan inrina thlengin kan ralvengtute tlawhkual hi hna hmasaah kan neih a ni,” K Sapdanga hian a ti.
State thenawmte nena inkalpawhna kawngpui dungah Mizoram tihmingtha theitu leh tihmingchhe theitu tam tak a awm tih sawiin, “Ramri hrula kan chet danah hnam hmel timawi lo thei a awm em tih leh sawrkar ang pawhin kan tihawm loh tak tih kan lo nei palh em tih inenfiah a tul a. Chuti ang a lo awm a nih chuan titawp tur leh ching zui lo tura mipui kan tan ho a pawimawh a ni,” Home minister hian a ti bawk.
Ramria sawrkar dinna BEFR 1875 la ni reng Home minister
