India chuan an ram lam atanga ‘dan lova ramria kân an awm chhunzawm zel’ a duh lo a ni tih lantir nan Inrinni khan Pakistani high commissioner a ko va. Hemi hma lawk hian Pakistan pawhin ramria an ram mi thahna avangin Indian palai a ko ve bawk.
New Delhi-in Pakistani palai a koh hma lawk hian Islamabad chuan an rama India palai lawk ber chu Zirtawpnia Indian ramri vengtu, Border Security Force (BSF) sipaiten Punjab-a Tarn Taran-a ram pahnih inrinaa Pakistani civil mi pahnih an thah avangin a ko ve bawk.
“External affairs ministry chuan Pakistan High Commission-a Charge d’Affaires chu India-in Pakiatan atanga dan lova ramri kân tum an la awm zel a duh loh avangin a ko va. India hian tanchhan mumal awm miah lova International Border hrul, Ferozepur sector, Punjab-a October 2, 2026-a an ram mi thata Indian sipai a puhna pawh a duh lo hle a ni,” tiin external affairs ministry hian thu a chhuah.
Hemi hma lawk hian Pakistani foreign ministry chuan Indian ramri sipaiten Pakistani civil mi pahnih an thah an duh loh avangin an rama Indian charge d’affaires chu an ko ve bawk.
Inrinnia thuchhuah an siamah ministry chuan BSF sipaiin ramria mi pahnih an kah hlum bakah mi pakhatin hliam a tuar bawk tih an tar lang a. “BSF sipaite hian tul lo taka boruak sosang siamin ralthuam engmah nei lo civil mite lakah na takin an che a. Hetianga tharum hman hi a dik lo va, a tha lo va, nunna hlu tak hloh a nih phah bawk,” an ti.
India lama sawi dan chuan BSF hian Indian ram china luh an tum a, warning an pe a, an kal luih zel avangin venhim hna thawktute hian an kap ta a ni.
Indian foreign ministry chuan he thil thleng hi Pakistan atanga ralthuam tawlhna niin a sawi.
“Pakistani lam atanga mi pathum, Indian ram luh tum hi BSF-in Pakistan-a kir tura an tih hnuah pawh ramri hungna an pan lui zel a. BSF chuan hlauhawm thei chu a lo dang kir a, he thil thleng hi Pakistan atanga ramri kâna ralthuam nena chetna nena inzawm niin a ngai a. Pakistani sorkar hi ramri kân rua ruihhlo tawlhna leh Pakistan Border Guard sipaiten chet dan pawh ennawn rawh se,” an ti.
India hian Pakistani palai a koh hnenah hian an ram chuan International Border leh tun hnaia inrem siamna an neih te zah tur te, thuneitute thu lova chet velna awm thin leh hetiang thil thleng thin a awm fo loh nana hma la turin a hrilh a ni.
Pakistani foreign ministry chuan hetianga mi thatna ‘ramri kân ruk tum’ anga chhuah chu a dik lo tih an sawi let ve bawk.
India chu ‘rang takin, langtlang leh rintlaka chhui turin’ an phut a, a mawhphurtu hmuh chhuah chu dan ang taka hremna pek an phut bawk a, tih dan pangngaia an thil hmuh leh hma an lak dan pawh Pakistani sorkar hnena hrilh turin an ti bawk.
Ramria thil thleng vangin India leh Pak-in palai inkohsak tawn
