English Premier League club lian Arsenal chuan si nghak thar an nei a, Brentford atangin Spain si nghak David Raya an la lut. Gunners manager Mikel Arteta chuan si nghak duh thlan chiang sa bik (No. 1 goalkeeper) an awm loh thu a sawi a. Hmun chang turin Aaron Ramsdale leh David Raya an inel nasa dawn.
Arsenal hian Brentford tana khel tha thei tak, Spain tan vawihnih khel tawh David Raya chuan Brentford atangin an hawh a, season tawp hunah a nghetin an la lut zui thei dawn. Arsenal hian nipui bazar inhawng mekah player lak nan sum an seng hnem tawh a, sum an sen hnem tawh laiin an player hralhna atangin an beisei angin sum an la hmu tam tawk lo. UEFA financial fairplay rules bawhchhiat hlauhthawnna an nei a, an inveng fimkhur. Hei vang hian si nghak Raya hi fing takin an hawh a, a nghetin an la lut nghal chuk chuk lo.
Gunners in Raya an lak uh hma hian England si nghak Aaron Ramsdale chuan hmun nghet a chang a, nekchhuak zo an awm lo. Raya a luh tak vangin season liam taah clean sheet vawi 14 nei Ramsdale hian elpui hautak a nei ta a, hmun nghet dang turin a beih fe a ngai dawn. Ramsdale leh Raya te hi an ineltawk viau dawn a, hmun nghet chang turin an thawhrim hle a ngai dawn. Manager Mikel Arteta ngeiin duh thlan sa bik an awm loh thu a sawi tlang thang ta hial bawk a, si nghak pahnihte tan inelna tilian zual tur a ni.
Arsenal manager Arteta chuan si nghak pahnihten hmun chan tuma inelna hautak an hmachhawn tur chu an hlawkpui ngei tur thu a sawi a. Possition tinah player ta tak tak an nei a, hmun chang tur chiang sa an awm lawk loh thu a sawi tel bawk. Season liam taah uiawm taka champion zo ta lo Gunners hian season kal mekah champion ngei an tum hle dawn a. Champion thei turin an inthuamchak tawk viau bawk.
Ramsdale leh Raya an inel nasa dawn
